Taleh Nəsibov: “Komanda olaraq bu işi yüksək səviyyədə bacardıq”

Azərbaycan Minifutbol Federasiyasının (AMF) icraçı vitse-prezidenti Taleh Nəsibovun Futbolxeber.az saytına müsahibəsi

- Azərbaycan millisi ev sahibliyi etdiyi dünya çempionatının qalibi oldu. Bu uğuru necə şərh edərdiniz?

- Bu cür turnirin keçirilməsi üçün hazırlıqlar çox stresli və çətin idi. Ondan da ağır olan isə keçirdiyimiz oyunlar idi. Hər bir çətinliklərdən sonra asanlıq gəlir. Biz bu çətinliyi keçdik. Mənim üçün bütün oyunlar final qədər həyəcanlı, çətin və stresli idi. Hər bir oyunu keçdikcə, rahatlıq tapırdıq, amma 1 günlük. Eyni zamanda, təşkilatçılığa nəzarət etmək var idi. Buna həm azarkeşlər, həm dövlətimiz, həm gələn xarici qonaqlar qiymət verəcəklər. Hər bir futbolun gözəlliyi onun azarkeşindədir. Belə möhtəşəm azarkeşin olduğu futbolda həm istək, həm sevgi, həm də inkişaf var. Təəssüratlarım gözəl, möhtəşəmdir. Biz bir dəfə Avropa çempionu olmuşduq. Çox arzulayırdıq ki, dünya çempionu olaq, hər iki titulumuz olsun. Şükürlər olsun Allaha, buna nail olduq.

- Son dünya çempionu Rumıniyanı 1/8 finalda məğlub etdikdən sonra düşündüz ki, artıq çempion olacağıq?

- Çempion olacağıq deməzdim, amma çempionluğa bərabər oyun idi. Qırılma nöqtəsi idi. O rəqibi adlayandan sonra artıq müəyyən hiss var idi ki, finala qədər gəlib çıxacağıq. Serbiya millisi çox hündür, cüssəli oyunçulardan ibarət komanda idi. Onlar yarımfinalda uduzaraq 3-cü yer uğrunda oynamalı oldular. Bir tərəfdən sanki o da işimizi bir az da asanlaşdırdı. Son Avropa çempionu idilər, çox klass oyunçuları var. Çox maraqlı komanda idi. Macarıstan - Serbiya oyunua “Zirə”nin baş məşqçisi Rəşad Sadıqovla birgə baxırdıq. İkimiz də deyirdik ki, xeyirlisi hansı komandadırsa, o da nəsib olsun. Penaltilərə gedəndə belə, bunu dedik. Macarıstanla qarşılaşdıq və onları məğlub edib çempion olduq.

- Millimiz həm Avropa, həm də dünya çempionu oldu. “Birbaşa Bakı” da Çempionlar Liqasını qazanıb. Bundan sonra minifutboldakı hədəflərimiz nədir?

- Hədəflər çoxdur. Birinci növbədə hədəf odur ki, bu idman növünü bundan sonra da ölkədə daha da yaxşı inkişaf etdirək, daha da yüksək səviyyəli oyunçular yetişdirək. Həm də, daim üzərimizdə işləyərək, titullarımızı qoruyub-saxlayaq. Ən azından hər dəfə böyük turnirlərdə medalçılar sırasında yer almağa çalışmalıyıq. Bayrağımızı yüksəltməli, ölkəmizi tanıtdırmalıyıq. Federasiyamız üçün bundan da gözəl nə ola bilər? Düşünürəm ki, hər bir federasiya, idman rəhbəri üçün böyük fəxrdir ki, öz xalqı qarşısında kuboku başı üzərinə qaldırsın.

- Planda, fikrinizdə gələcəkdə Çempionlar Liqasını da Bakıda keçirmək var?

- Hələ bir nəfəs alaq (gülür). Tədbirləri keçirmək asan deyil. Düşünürəm ki, bu il üçün bəsdir. Heç olmasa bir il gözləyək, istirahət edək. Sentyabr-oktyabr ayından bu tədbirin üzərində işləyirik. Qarşımıza rəhbərliyimiz tərəfindən qoyulan tapşırıq bu cür idi: dünya çempionatı möhtəşəm, səviyyəli, Azərbaycanın adına layiq keçirilməlidir. Orxan müəllim rəhbər olaraq, daim bütün işləri də nəzarətdə saxlayırdı. Daim bizdən hesabat alırdı. Düşünürəm ki, bir komanda, bir ailə olaraq bu işi yüksək səviyyədə bacardıq. Bunu siz qiymətləndirin. Çempionluq bir kənara, oyunlar zamanı ab-havanı gördünüz. Tamam fərqli idi.

- Minifutbol arenasının inşası məsələsi bir ara gündəmdə idi. Dünya çempionluğu bu işi daha da tezləşdirə bilər?

- Hər şey maddiyyata bağlıdır. Bu çempionatın keçirilməsi ilə bağlı böyük xərclərimiz olub. Əlbəttə, hamımız çox istəyirik. Başda da federasiya prezidentimiz Orxan Məmmədov olmaqla. Çox istəyirik ki, möhtəşəm stadion inşa etdirək. Sıradan stadion tikə bilərik. Bu gün başa düşdük ki, 3-4 minlik stadion azdır. 7500 tutumu olan arenada oynadıq, bütün günləri də dolurdu arena. Yenə də maliyyəyə bağlı məsələdir. İstəyərdim ki, heç olmasa 10 minlik stadion olsun ki, belə tədbirlər keçirəndə, kiməsə deməyək ki, bilet bitdi. İnanın final oyununa bilet üçün telefonum dayanmırdı. Satışı açdıq, bir saata biletlər bitdi. Gecə bir hissəsi qalmışdı, satış açdıq, 15 dəqiqəyə bitdi. Bir hissəsi də 1 saata bitmişdi. Azarkeşlər möhtəşəm idi. İnsanların oyunlarımız gəlmək istəyi adamı qürurlandırır.

- Milli Gimnastika Arenasında quraşdırılan ot örtüyünü hansı stadiona köçürüləcək?

- Ağ şəhər bulvarında tikdiymiz meydança var, artıq bitmək üzrədir. Dünya çempionatı üçün olan ot örtüyünü də ora sərəcəyik.

TAĞI