Mitu çempionluğu şərh etdi: “Zirə”nin legionerlərlə oynaması bizi daha da motivasiya etdi”

“Çox gərgin və maraqlı oyun alındı. Yenidən ən güclü olduğumuz üçün sevinirik. Çempionluq çox gözəl hissdir”.

Futbolxeber.az saytına müsahibəsində bu sözləri minifutbol üzrə Azərbaycan çempionatının finalında “Zirə”ni məğlub edərək qızıl medallara sahib çıxan “Birbaşa Bakı”nın baş məşqçisi Marius Mitu deyib.

Rumın mütəxəssis həlledici matça çox yüksək motivasiya ilə çıxdıqlarını bildirib: “Finaldan öncə heyətimizdə çox ciddi itkilər var idi. Bu da bizi narahat edirdi. Həm də “Zirə” olduqca güclü rəqibdir. Üstəlik, heyətlərini Qazaxıstan millisinin 3 üzvü ilə gücləndirmişdilər. Lakin bu bizi qorxutmurdu. Əksinə, “Zirə”nin legionerlərlə oynaması bizi daha da motivasiya etdi. Rəqibin heyətinin yarısı Azərbaycan millisinin, yarısı isə Qazaxıstan yığmasının üzvlərindən qurulmuşdu. Buna baxmayaraq, komandamız yaxşı mübarizə apardı. Ola bilər ki, ən yaxşı oyunumuzu sərgiləmədik. Bununla belə, layiqli mübarizə apardıq və yenidən çempion olduq”.

O, “Birbaşa Bakı”nın ardıcıl dördüncü dəfə ölkə çempionu olması münasibəti ilə futbolçularını və kollektivi təbrik edib: “Meydanda əsl final ab-havası hiss olunurdu. Bizi dəstəkləyən və qələbəmizdə pay sahibi olan hər kəsə təşəkkürümü bildirirəm".

M.Mitu hazırda növbəti turnirlər yox, istirahət barədə düşündüyü söyləyib: “Qarşıda bizi Çempionlar Liqası gözləyir. Amma həmin turnirə hələ çox var. İndiki məqamda bir qədər istirahətə ehtiyac duyuruq. Çünki çox gərgin mövsümü başa vurduq. Azərbaycan çempionatında rəqabət ildən-ilə daha da artır”.

Xatırladaq ki, finalda "Zirə"ni 2:0 hesabı ilə məğlub edən "Birbaşa Bakı" ardıcıl dördüncü dəfə Azərbaycan çempionu olub.