Mitu “Zirə”ni ittiham etdi: “Bu, Azərbaycan millisinin də ziyanınadır”

Minifutbol üzrə “Birbaşa Bakı” klubunun baş məşqçisi Dan Mitunun Futbolxeber.az saytına müsahibəsi

- Yarımfinalın ikinci oyununda “Galaxy”ni 3:0 hesabı ilə məğlub edərək Azərbaycan çempionatının finalına yüksəldiniz. Demək olar ki, cavab matçı komandanız üçün asan keçdi?

- Belə deməzdim. Çünki ilk hissədən sonra qapılara qol vurulmamışdı. Rəqib çox aqressiv oynayırdı, uzun toplardan istifadə edirdilər. Meydanda gərgin mübarizə gedirdi. İkinci hissədə üstünlüyü ələ aldıq və lazımi qolları vurduq.

- “Birbaşa Bakı” finala nə dərəcədə hazırdır?

- Hələ vaxta var. Finala qədər məşqlərimizi davam etdirəcəyik. Düşünürəm ki, martın 11-də 100 faiz hazır olacağıq.

- Ötən il Avropanın ən yaxşı müdafiəçisi seçilmiş Vüsal İsayev zədəli olduğu üçün yarımfinalda komandanıza kömək edə bilmədi. Finalda onu meydanda görə biləcəyik?

- İndidən dəqiq fikir bildirmək çətindir. Lakin ümid edirəm ki, finala qədər zədəsini bərpa edəcək. Vüsal bizim üçün vacib oyunçudur. Yarımfinalın cavab matçından öncə Təmkin də məşqdə zədə aldı.

- Finalda “Zirə” ilə qarşılaşacaqsınız. Gözləntiləriniz nədir?

- “Zirə”ni tanıyırıq. Onlara qarşı çox oynamışıq. Hazırda heyətlərini Qazaxıstan millisinin 3 üzvü ilə gücləndiriblər. Həmin oyunçular kifayət qədər güclüdürlər. Lakin hazırlaşacağıq. Finalda qalib gəlmək üçün əlimizdən gələni edəcəyik.

- Mövsümün ilk yarısında “Zirə”ni məğlub etmişdiniz. Razısınız ki, ötən illə müqayisədə hazırda “Birbaşa Bakı” daha güclü təsir bağışlayır, “Zirə” isə zəifləyib?

- Deməzdim ki, zəifləyiblər. Mövsümün ilk hissəsində onları məğlub etsək də, “Zirə” hər zaman təhlükəli rəqibdir. Təcrübələri var. Məşqçiləri çox güclüdür.

- Final öncəsi şansları necə dəyərləndirirsiniz?

- 50-nin 50-yə.

- Yəni heç bir komandanın digəri üzərində azacıq da olsa üstünlüyü yoxdur?

- Bəlkə də şanslar 51-in 49-a rəqibin xeyrinədir. Çünki dediyim kimi, heyətlərini Qazaxıstan millisinin 3 üzvü ilə gücləndiriblər.

- Ola bilərmi ki, siz də final öncəsi heyətə Rumıniyadan oyunçular dəvət edəsiniz?

- Xeyr, mən bunu bəyənmirəm. Düşünürəm ki, Azərbaycan minifutbolu üçün bu, yaxşı hal deyil. Burda çempion olmaq üçün Qazaxıstan millisinin üzvlərini heyətə cəlb etməyi düzgün saymıram. Oyunçular il boyu məşq edirlər, mübarizə aparırlar, indi isə yarımfinal və finalda digərləri gəlib onların əvəzinə oynayır. Çempionlar Liqası öncəsi bu addımı normal sayıram. Çünki orada sən digər ölkələrin klublarına qarşı mübarizə aparırsan. Azərbaycan çempionatı üçün isə bunu düzgün saymıram. Bu, millinin də ziyanınadır. Axı Qazaxıstan dünya çempionatında Azərbaycan yığmasının əsas rəqiblərindən biridir.

- Deməli, “Zirə”nin bu addımının dünya çempionatı öncəsi Azərbaycan millisinin əleyhinə olduğunu düşünürsünüz?

- Bəli. Mən belə düşünürəm. Belə çıxır ki, bizim oyunçular kifayət deyil.

İbrahim Cəfərov