Rəcəb Fərəczadə sensasiyanı şərh etdi: “Mən olmasaydım da, “Zirə”ni udacağdıq”

“Uşaqlar verilən tapşırıqları yerinə yetirdilər. Əzmkarlıq nümayiş etdirdilər. Rəqib güclü olsa da, yaxşı oynadıq. “Zirə”nin elə də çox qol epizodu olmadı. Yəni layiqli qələbə qazandıq. Nəticə oyuna görə idi”.

Futbolxeber.az saytına müsahibəsində bu sözləri minifutbol üzrə ölkə çempionatının 1/4 finalında “Zirə”ni məğlub etməklə (2:0) sensasiyaya imza atan “Aznur”un baş məşqçisi Rəcəb Fərəczadə deyib. 

Mövsümün ilk hissəsində “Aznur” “Zirə”yə məğlub olmuşdu. Mütəxəssis iki matç arasındakı fərqi belə izah etdi: “Mövsümün ilk yarısında 2:5 hesabı ilə uduzmuşduq. Tək həmin yox, digər oyunlarda da uşaqlar müdafiə xəttində çox səhv edirdilər. Mən arxada rəqibi aldatmağın əleyhinəyəm. Pasla çıxmaq lazımdır. Uduzduğumuz matçdan fərqli olaraq, bu dəfə “Zirə” ilə görüşdə uşaqlar tapşırıqları düzgün yerinə yetirdilər, vuruşdular”.

Qələbəyə baxmayaraq, baş məşqçi cavab oyunu öncəsi favorit olmaları fikri ilə razılaşmayıb: “İkinci görüşdə nə olacağı bilinmir. Bu oyunu unutmalıyıq. Cavab matçında hər şey sıfırdan başlayacaq. Həmin görüşə də çox ciddi hazırlaşmalıyıq. Çempionat başlayanda demişdim ki, “Zirə” və “Birbaşa Bakı”nı çıxmaqla qalan 14 komanda arasında ciddi fərq yoxdur. Hər rəqib digərini məğlub edə bilər”.

Maraqlıdır ki, “Aznur” çempionata yaxşı start versə də, sonradan “qara zolağ”a düşdü. Hətta pley-offa vəsiqəni yalnız son turda təmin etdi. R.Fərəczadə bunun səbəbini belə izah etdi: “Bizdə bəzi uşaqlar başqa yerdə də oynayırlar. Ona görə həftədə cəmi 1 dəfə biryerdə məşq edə bilirik. Bu da nəticələrə təsir edir. Amma “Zirə” ilə görüşdə qələbə komandanın haqqı idi. Düşünürəm ki, mən olmasaydım da, “Zirə”ni udacağdıq”.

Rəcəb Fərədzadə futzaldakı çıxışları ilə tanınsa da, bu gün məşqçi kimi minifutbolda çalışır. Görəsən, niyə belə alınıb? “İdmandan kənar başqa işim var. Ona görə burda da işləmək istəmirdim. Sadəcə klubun sponsoru  dostumdur. O, “Aznur”da olmağımı istədi. Mən də artıq 5 ildir ki, burdayam”.

İbrahim CƏFƏROV