“Kasıblar”ın lideri – “Şamaxı”

Azərbaycan Premyer Liqasının cəmi 6 tur geri qalsa da, artıq indidən mövsümün sonunda hansı komandaların ilk beşlikdə qərarlaşacağı məlumdur. Əslində, bu, hələ çempionat başlamamışdan əvvəl də bəlli idi. Mövsümün sonunda ilk beşlikdə indi olduğu kimi, “Neftçi”, “Sabah”, “Qarabağ”, “Turan Tovuz” və “Zirə” yer alacaq. Sadəcə kimin neçənci yeri tutacağı bilinmir. Bu sonluğu proqnozlaşdırmaq üçün Məşədi İbad demişkən, “Tarixi-Nadir”i yarıya qədər oxumağa, “Çto, qde, koqda” oynamağa, yaxud “Milyonçu”ya çıxmağa ehtiyac yoxdur. Bu gün Azərbaycan Premyer Liqasında ilk beşlikdə qərarlaşan klublar istər büdcəsinə, istər heyətinə görə digər yeddiliyi açıq-aşkar üstələyir. Əvvəl, çempionatda limit olduğu vaxtlarda hansısa komanda boyundan yuxarı tullana bilirdi. Bu baxımdan “Sumqayıt”ın, yaxud “Araz-Naxçıvan”ın bürünc medal qazanmasını nümunə kimi göstərmək olar. Lakin limitin ləğvi klublar arasında uçurum yaradıb.

İkinci yeddilikdə əsas mübarizə altıncı yer uğrundadır. Hansı komanda mövsümü altıncı pillədə başa vursa, mənə görə həmin kollektiv “kasıblar”ın lideri, yaxud çempionudur.

6 turdan sonra bu mübarizədə lider “Şamaxı”dır. Bölgə təmsilçisi mövsümün ilk turunda səfərdə “Qarabağ”a uduzsa da – bu da gözlənilən idi – sonradan özünü yaxşı tərəfdən göstərməyi bacardı. Azər Bağırovun komandası növbəti 5 turda səfərdə “Turan Tovuz”dan, “Qəbələ” və “Sumqayıt”dan xal aldı, Gəncədə “Kəpəz”i, son turda da öz meydanında “Araz-Naxçıvan”ı məğlub etdi. Özü də qeyd etmək lazımdır ki, “Şamaxı” cari mövsümün ilk 5 turunda oyunlarını səfərdə keçirib. Komandanın doğma meydandakı debütunu yalnız 6-cı tura təsadüf edib. Elə altıncı turdakı qələbə sayəsində də bölgə təmsilçisi fasiləyə altıncı yerdə yollana bildi.

Halbuki çempionat başlamamışdan əvvəl “Şamaxı”nın “Kəpəz”lə birgə cari mövsümün iki autsayderindən biri olacağı ehtimal edilirdi. Bunun üçün bir neçə tutarlı səbəb də var idi. Birincisi, “Şamaxı” bu gün çempionatda ən aşağı büdcəli iki komandadan biridir. İkincisi, baş məşqçi postunda dəyişiklik olmuşdu və belədə Azər Bağırov istədiyi komandanı formalaşdırmaq üçün zamana ehtiyac duyurdu. Üçüncüsü də, Dioqo Balau, Karim Rossi kimi aparıcı futbolçular komandadan getmişdilər. Lakin geridə qalan 6 tur ərzində “Şamaxı” bədbin proqnozları alt-üst etdi. Komandanın uğurlu çıxışında ən böyük sahibi isə şübhəsiz, baş məşqçi Azər Bağırovdur. Təcrübəli mütəxəssis qısa zamanda legionerlərlə gənclərin vəhdətindən əla komanda formalaşdırıb. Təsadüfi deyil ki, bu gün “Şamaxı”nın iki futbolçusu əsas, altı futbolçusu isə Azərbaycanın U-21 millisinə dəvət alıb. Yaddaşım məni aldatmırsa, bu, klubun tarixində rekord göstəricidir. Klubların legionerlərə qucaq açdığı hazırkı dövrdə “Şamaxı”nın 8 futbolçusu ölkəmizin əsas və U-21 yığmasına dəvət alırsa, məşqçi işinə biganə qalmaz olmaz. Təkcə elə Edqar Adilxanovun adını çəkmək kifayətdir. Düzdür, gənc futbolçu Ayxan Abbasovun dövründə “Şamaxı”dakı çıxışı ilə tanınıb, özünü göstərib. Lakin ötən mövsümün sonlarında 21 yaşlı futbolçu bir qədər kölgəyə çəkilmişdi. Azər Bağırovun gəlişi ilə o, yenidən parlaq oyunu ilə seçildi və layiqli şəkildə əsas milliyə dəvət aldı.

Azər Bağırovun “Şamaxı”dakı işi həm də “İmişli”, “Şəfa” kimi klublara nümunədir. Təcrübəli mütəxəssis sübut edir ki, daha aşağı büdcə ilə həm yaxşı kollektiv formalaşdırmaq mümkündür, həm də Azərbaycan futboluna xidmət etmək, gəncləri əsas və U-21 yığmasına qazandırmaq. Təbii ki, bunun üçün istək olmalıdır. Yox, sən pulu, komandaya daha çox legioner transferi düşünəcəksənsə, futbola yox, başqa məqsədlərə xidmət etmiş sayılırsan...

İBRAHİM