Yenilənmiş “Araz-Naxçıvan”... ümid verdi

2 gün əvvəl “Araz-Naxçıvan” yoxlama oyununda “İmişli” ilə üz-üzə gəlirdi. Əvəzedici heyətə qarşı keçirilən görüşü nəzərə almasaq, bu, yenilənmiş Naxçıvan klubunun ilk sınağı idi. Bu səbəbdən də komandanı iş başına görmək üçün Bakı Olimpiya Stadionuna (BOS) üz tutduq.

BOS-un ehtiyat meydançasında baş tutan matçda ilk diqqəti çəkən “İmişli”nin məşq formasında meydana çıxması idi. Bir anlıq göz önünə ötən mövsüm bölgə təmsilçisinin oyun formasında məşq etməsi gəlirdi. Belə çıxır ki, bir il ərzində “İmişli”də müəyyən dəyişiklik olub. Hər halda əvvəl oyun formasında məşq edirdilər, indi isə məşq formasında oyuna çıxırlar...

Qayıdaq “Araz-Naxçıvan”a. Cavid Hüseynov start heyətində demək olar ki, əksər aparıcı üzvlərə şans vermişdi. İlk “11-lik”də həm ötən ildən komandada qalan Tərlan Əhmədli, Bruno Franko, İssouf Paro, Mustafa Əhmədzadə, Patrik Andrade, Şarl Boli var idi, həm də yeni transferlərdən Rövlan Muradov, Mara Mohamed, Abdallah Sudi, Alberto Qarsia Fernandes.

İkinci hissədə Cavid Hüseynov bütövlükdə heyəti dəyişdi. Komanda əsasən baxışda olan və əvəzedici heyətdən cəlb edilən gənclərlə mübarizə apardı. Eləcə də yeni transferlərdən Alexandro Herrera, Auqusto Da Silva və Ceyhun Nuriyevi iş başında görmək mümkün oldu.

Gələcəkdə əsas heyət üzvünə çevrilmək şansı yüksək olan Luka Dumançiç zədəsini təzəcə bərpa etdiyi üçün, sabiq “Neftçi”li

Mamadu Kane isə 3 aya yaxın meydana çıxmadığı üçün fərdi şəkildə məşq edirdilər.

Görüş 2:2 hesabı ilə yekunlaşdı. “Araz-Naxçıvan”ın heyətində ilk hissədə Mara Mohamed, fasilədən sonra isə Ceyhun Nuriyev fərqləndi. Hər iki qol baxımlı alındı. Mara cinahda fərdi reyd edərək, Nuriyev isə uzaqdan baxımlı zərbə ilə rəqib qapısına yol tapdı.

İlk diqqəti çəkən Cavid Hüseynovun daim yarımmüdafiədə görməyə alışdığımız Rövlan Muradovu sağ cinah müdafiəçisi kimi sınaması idi. Muradov ümumilikdə yeni mövqedə heç də pis təsir bağışlamadı.

Birinci 45 dəqiqədə nəinki “Araz-Naxçıvan”ın, ümumilikdə meydanın ən yaxşısı Mara idi. Qvineyalı vinger öz cinahında demək olar ki, istədiyini edirdi. Bu tempdə davam edəcəyi halda, Maranın qarşıdakı mövsümdə rəqiblər üçün ciddi başağrısına çevriləcəyini proqnozlaşdırmaq olar.

Fasilədən sonra isə meydanın mərkəzində yeni transferlər Ceyhun Nuriyev və Alexandro Herrera diqqəti daha çox çəkirdilər. Yuxarıda qeyd etdiyimiz kimi, Nuriyev baxımlı qola imza atdı. Bəstəboy kolumbiyalı isə vuruşqanlığı ilə seçilirdi.

Ümumilikdə, “Araz-Naxçıvan” gələcəyi ümid verdi. Klubun büdcəsinin 50-60 faiz azaldılmasından sonra çoxları Naxçıvan klubunun qarşıdakı mövsümdə autsayderlər sırasında olacağını ehtimal edirdi. Lakin gördüklərimiz tam əksinə oldu. Büdcə azaldılsa da, Naxçıvan klubunun uğurlu seleksiya apardığını söyləmək mümkündür. Əsas çatışmazlıq müdafiənin mərkəzi ilə bağlıdır. Dumançiçi iş başında görməsək də, Paro necə deyərlər, həminki Parodur. Ona görə də “Araz-Naxçıvan” ötənilki səhvləri təkrarlamamaq üçün mütləq daha bir müdafiəçiyə ehtiyac duyur. Elə istər oyun ərzində söhbətləşdiyimiz klub rəsmiləri, istərsə də matçdan sonra baş məşqçi Cavid Hüseynov daha bir transfer reallaşdırmaq istədiklərini bildirdilər. Əminliklə demək olar ki, həmin transfer reallaşarsa, Naxçıvan klubu qarşıdakı mövsümdə əksər favoritlərə başağrısı ola bilər. Komandanın hazırkı potensialı 5-6-cı yerlər uğrunda mübarizə aparmağa imkan verir. Bir daha qeyd edək ki, ötən mövsümlə müqayisədə klubun büdcəsi 50-60 faiz azaldılsa da, seleksiya prosesinin düzgün aparılması gələcəyə ümid verir.

İBRAHİM