Demçenko: "Hava şəraiti və stadionun vəziyyəti yaxşı oyun göstərməyə imkan vermədi"

“Hava şəraiti və stadionun vəziyyəti yaxşı oyun göstərməyə imkan vermədi. Yaxşı oyun nümayiş etdirməyə çalışdıq. Təəssüf ki, standart vəziyyətdən qol buraxdıq. Oyuna nəzarət edirdik. Futbol belədir ki, qol vurmayanda sənə qol vururlar”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Andrey Demçenko Azərbaycan Premyer Liqasının 17-ci turunda “İmişli” ilə bərabərə qaldıqları (2:2) oyundan sonra deyib.

Daha sonra ukraynalı mütəxəssis jurnalistlərin suallarını cavablandırıb:

- Qapıda Tərlan Əhmədliyə şans verməyinizin səbəbi nə idi?

- Oyunçulara baxırıq. Ən yaxşı variantı yoxlamağa çalışırıq. Elə futbolçular var ki, verilən tapşırıqları daha tez yerinə yetirirlər.

- 60-cı dəqiqədən sonra üstünlük rəqibə keçdi. Əvəzetmələrə gecikdiyinizi düşünmürsünüz?

- Bu vəziyyətdə olan meydançada oyuna nəzarət etməyə çalışdıq. Bəzən 90 dəqiqə dominant oynaya bilmirsən. Bu, bizim səhvlərimizdən oldu.

- Karyeranız ərzində bundan pis meydança görmüsünüz?

- "İmişli" də eyni şərtlərdə oynayırdı. Belə vəziyyətdə komanda gücünü göstərməlidir. Ukraynada da belə stadionlar olub.

- Start heyətində azərbaycanlı futbolçular çox idi. Bu, məcburiyyətdən atılmış addım idi?

- Mən futbolçuları yerli və legioner olaraq ayırmıram. Bizim 20 oyunçumuz var. Kim məşqlərdə daha yaxşı olacaqsa, o da oynayacaq. Vacib olan nəticə qazanmaqdır.