UEFA-nın saytı "Napoli" - "Qarabağ" oyunundan yazdı

UEFA-nın saytı Çempionlar Liqasının 5-ci turunun "Napoli" - "Qarabağ" oyunu ilə bağlı yazı hazırlayıb. Futbolxeber.az yazını təqdim edir.

“Napoli” UEFA Çempionlar Liqasının ümumi mərhələsinin beşinci turunda “Qarabağ”ı qəbul edir və qələbə qazanacağı halda Azərbaycan çempionu ilə xallarını bərabərləşdirəcək.

Əvvəlki qarşılaşmalar

“Napoli” Azərbaycan təmsilçisi ilə ilk dəfə qarşılaşır. “Qarabağ” isə bundan əvvəl İtaliya klubları ilə keçirdiyi altı oyunun heç birində qalib gəlməyib (1 heç-heçə, 5 məğlubiyyət) və səfərdə oynadığı üç görüşün hər birində uduzub.

“Atlar” son dəfə A Seriyası təmsilçisi ilə əvvəlki (və indiki mövsümə qədər yeganə) Çempionlar Liqası mövsümündə qarşılaşıb. ÇL-2017/18-in qrup mərhələsində azərbaycanlılar “Roma”ya evdə 1:2, səfərdə isə 0:1 hesabı ilə uduzublar.

“Napoli”

Bu, “Napoli”nin Çempionlar Liqasının əsas mərhələsində 9-cu çıxışıdır. Komandanın ən yaxşı nəticəsi 2022/23 mövsümündə qeydə alınıb – o zaman klub 1/4 finala yüksəlmişdi. Ötən mövsüm neapollular 2009/10 mövsümündən sonra ilk dəfə avrokuboklardan kənarda qalmışdılar.

“Qarabağ”

“Qarabağ” Çempionlar Liqasının əsas mərhələsinə ikinci dəfə yüksəlib. Komanda ilk dəfə ÇL-2017/18 mövsümündə qrup mərhələsində çıxış etmiş və “Roma”, “Çelsi” və “Atletiko” ilə eyni qrupda sonuncu yeri tutmuşdu. Ağdam təmsilçisi həmin mövsüm iki xalını məhz “Atletiko”ya qarşı matçlarda qazanmışdı.

“Qarabağ” Çempionlar Liqasının əsas mərhələsində iştirak etmiş yeganə Azərbaycan komandasıdır.

Bu, klubun avrokuboklarda ardıcıl 12-ci ümumi/qrup mərhələsidir. Ötən mövsüm UEFA Avropa Liqasının ümumi mərhələsində azərbaycanlılar 8 oyunun 7-də məğlub olmuş (1 qələbə) və 36 komanda arasında sonuncu yeri tutmuşdu.

Əsas statistik göstəricilər

“Napoli” 4-cü turda “Ayntraxt”la 0:0 oynayıb və son 19 ev Çempionlar Liqası oyunundan yalnız birində məğlub olub (11 qələbə, 7 heç-heçə). Bununla belə, 2024/25 mövsümünün İtaliya çempionu turnirin əsas mərhələsində keçirdiyi son 6 oyunun yalnız birini qazanıb (2 heç-heçə, 3 məğlubiyyət). Bu mövsüm 4 turdan sonra italiyalıların aktivində 4 xal var.

“Napoli” Çempionlar Liqasında heç vaxt ardıcıl iki oyunda qol vurmadan qalmayıb. Komanda əsas mərhələdə keçirdiyi 32 ev matçının 30-da rəqib qapısına yol tapıb.

“Qarabağ” bu mövsüm keçirdiyi 10 avrokubok oyunundan yalnız 2-də uduzub (7 qələbə, 1 heç-heçə). 4-cü turda Qurban Qurbanovun komandası evdə “Çelsi” ilə 2:2 oynayıb. “Atlar” cari avrokubok mövsümündə evdə keçirdiyi beş oyunundan üçünü qazanıb (1 heç-heçə, 1 məğlubiyyət).

“Qarabağ” ümumi mərhələnin startında səfərdə “Benfika” üzərində 3:2, evdə isə “Kopenhagen” üzərində 2:0 hesablı qələbə qazanıb – bunlar klub tarixində əsas mərhələdə əldə olunan ilk qələbələrdir.

“Atlar” Çempionlar Liqasındakı son 7 oyununda 18 qol vurub.

Kabo-Verdedən olan vinger Leandro Andrade “Qarabağ”ın son 6 avrokubok oyunundan 5-də qol vurub.