Davam edir... hakim biabırçılığı

Azərbaycan Premyer Liqasının 8-ci turu da hakim səhvləri olmadan ötüşmədi. Əslində bu, artıq ənənə halını alıb. Hər turdan sonra oyunların nəticələri, keyfiyyəti, qalır bir kənarda, əsas müzakirə mövzusu hakimlik olur.

Bu tur ədalət qoruyucularından narazı qalan klubların sırasına “Qəbələ” də qoşuldu. Əyalət təmsilçisi sosial şəbəkə hesabı vasitəsi ilə etirazını bildirib. Görüntülərdən də görünür ki, klubun narazılığı tam haqlıdır. “İmişli”nin futbolçusu Ronaldo de Souza aşkar şəkildə topa əllə toxunur. Matçın baş hakimi İnqilab Məmmədov isə həmin epizodda cərimə zərbəsi təyin etsə də, nədənsə braziliyalı müdafiəçiyə vərəqə göstərmir. Halbuki Souza qəsdən əllə oynayaraq hücumun qarşısını alır və bu, birmənalı şəkildə vərəqədir. Buna qədər matçın əvvəlində cəzalanan futbolçu həmin epizodda ikinci sarı vərəqə ilə meydandan qovulmalıydı. Lakin İnqilab Məmmədov Souzaya güzəşt edir və yekunda bu, “Qəbələ”nin xal itkisi ilə nəticələnir. Çünki 58-ci dəqiqədə meydandan qovulmalı olan Ronaldo 74-cü dəqiqədə komandasının ilk qolunu vurur. Sonradan daha bir dəfə fərqlənən “İmişli” yekunda meydanı 1 xalla tərk edir. Uzun sözün qısası, hakim səhvi “Qəbələ”ni qələbədən edir...

“Turan Tovuz” - “Qarabağ” oyununda Sami Mmaeyə 24-cü dəqiqədə göstərilən sarı vərəqə də narazılıq doğurdu. Qapıçı ilə təkbətəyə gedən hücumçunu yıxdığı üçün “Qarabağ”ın müdafiəçisinə qırmızı vərəqə də göstərmək olardı. Sadəcə Kevin Medinanın epizoda yaxın olması bir qədər mübahisəyə yol açır...

Hakimliklə bağlı digər narazılıq “Neftçi” - “Araz-Naxçıvan” matçında yaşandı. Stadiona toplaşan azarkeşlər 90 dəqiqə ərzində meydanda əla mübarizəyə şahidlik etsələr də, hakimlərin idarəçiliyi ilə oyunun keyfiyyəti tərs mütənasib idi. Fərid Hacıyevin rəhbərlik etdiyi hakimlər briqadası işinin öhdəsindən lazımınca gələ bilmədi. Buna qədər “Neftçi” son turlarda açıq-aşkar hakim səhvlərindən əziyyət çəkirdi. İstər “Sabah”la oyunda verilməyən penalti, “Turan Tovuz”la görüşdəki qırmızı vərəqə, “Zirə” ilə matçdakı penalti və s. Əminliklə söyləmək olar ki, “Neftçi” ən azı 3 oyunda hakim səhvlərinə görə xal itirmişdi. Amma bu dəfə eyni halın yaşanma ehtimalı yüksək deyildi. Çünki gəzən şayiələrə inansaq, hakimlər başda “Sabah” olmaqla bir neçə klubun xeyrinə qərarlar qəbul edirlər ki, “Araz-Naxçıvan” da o “qrup”a aid deyil. Bu səbəbdən də “Neftçi” - “Araz-Naxçıvan” görüşündə hakimlərin ədalətli idarəçiliyinə ümid böyük idi.

Gəl ki, artıq ilk dəqiqələrdən bu ehtimal özünü doğrultmadı. Fərid Hacıyevin xırda follarda belə qərarları mübahisə doğururdu. Referi stadionunun ikinci mərtəbəsindən açıq-aşkar görünən epizodlarda yanlış qərarlar qəbul edirdi. İstər “Neftçi”nin, istərsə də “Araz-Naxçıvan”ın xeyrinə. Bu da futbolçularda aqressiya yaradırdı. Məsələn, Felipe Santosun 28-ci dəqiqədə sarı vərəqə aldığı epizoddakı kobud oyunu birbaşa hakim qərarlarının doğurduğu aqressiyadan irəli gəlirdi. Hakimlərin oyuna damğa vuran qərarı isə “Neftçi”nin ikinci qolu oldu. Stadiondan oyunu izlədiyimiz mövqedən epizod ofsayta oxşayırdı. Hakim də dərhal əlini havaya qaldıraraq qolu qeydə almadı. Lakin sonradan top hesaba alındı. Videoyazıdan epizodla bağlı 100-də 100 dəqiq fikir bildirmək çətindir. Sadəcə məsələ ondadır ki, matçın gedişində VAR-ın işləmədiyi deyilmişdi. Sonradan problemin aradan qalxdığı söylənsə də, matçın sonuna qədər həmin epizodun xətli görüntüsü yayımlanmayıb. Əgər VAR işləyirdisə, niyə xətli görüntü təqdim olunmayıb? Yox, VAR işləmirdisə, hakim qolu necə hesaba aldı? Belə çıxır ki, hakimlər “Zirə” ilə oyundakı günahlarını yumağa çalışırlar? Elədirsə, bunda “Araz-Naxçıvan”ın günahı nədir? Ümumiyyətlə, VAR niyə işləmir axı? Eyni problem “Zirə” - “Neftçi” matçında da yaşanmışdı. Hakim şəkillərə baxıb “Neftçi”nin qapısına penalti təyin etmişdi. Fikrimizcə, bu epizodda ən yaxşı mövqedə olan yan xətt hakimi idi. O da ofsayt qərarı qəbul etmişdi...

Beləcə, qələbəni əldən verən “Araz-Naxçıvan” liderliyə yüksəlmək şansından da məhrum oldu. İndi necə olacaq, belə çıxır ki, gələn tur da hakimlər “Araz-Naxçıvan”ın könlünü alacaqlar? Rəqibin “Sabah” olduğunu nəzərə alsaq, bu, mümkünsüzdür... “Araz-Naxçıvan”, ən yaxşı halda “Karvan-Yevlax”la oyunu gözlə...

İBRAHİM