Santuşdan öncə AFFA rəhbərliyi istefa verməlidir!

DÇ-2026-nın seçmə mərhələsi Azərbaycan millisi üçün başlamamış bitdi. İslandiya 5 cavabsız qol vurub yığmamızı Bakıya boynubükük göndərdi. Onsuz da son zamanlar millimizin üzvlərinin vətənə boynubükük dönməsi adət halını alıb. Bir şey ki, Fernandu Santuşun rəhbərliyi altında yığmamız səfərdə keçirdiyi rəsmi oyunların hamısında uduzub.

Dünən portuqaliyalının Azərbaycan millisindəki debütunun 1 ili tamam olurdu. Santuşun Azərbaycan yığmasının baş məşqçisi kimi siftəsi 2024-cü ilin 5 sentyabrına təsadüf etmişdi. Bu bir ildə millimiz onun rəhbərliyi altında 11 oyun keçirib. Yalnız 2 dəfə (öz meydanında Estoniya, səfərdə Latviya) heç-heçəyə imza atan yığmamız qalan 9 oyunun hamısında uduzub. Topların fərqi də biabırçıdır - 4-29. Bir sözlə, Fernandu Santuşun millimizdəki fəaliyyəti sıfırdır.

Əslində, günahın daha böyüyü AFFA rəhbərliyindədir. Yəni həmin sıfırdan daha da böyüyü düşür assosiasiyada əsas söz sahibi olanların payına. Çünki Santuşun Azərbaycana gəldiyi ilk gündən onun uğursuz olacağı gözlənilən idi. Bunu bilmək üçün Vanqa, yaxud Nostradamus olmağa ehtiyac yoxdur. Portuqaliyalının son illərdəki uğursuz karyerası belə düşünməyə əsas verirdi. Zaman da kimin haqlı olduğunu göstərdi. Azərbaycan yığmasının bu gün düşdüyü biabırçı durumda təbii ki, portuqaliyalı mütəxəssisin də günahı var. Lakin günahın daha böyüyü onu Azərbaycan millisinə gətirənlərdədir. Bir il ərzində bir məşqçi 11 oyunun heç birində qələbə qazana bilmirsə, deməli, təyinatı kökündən yanlış qərar olub.

Azərbaycan yığması sonuncu qələbəsini 2024-cü ilin 11 iyununda qazanıb. Həmin vaxt milli müvəqqəti olaraq Arif Əsədova tapşırılmışdı. Əsədovun rəhbərliyi altında 4 oyun keçirən Azərbaycan yığması Qazaxıstanla yanaşı, Monqolustana qalib gəlmiş, Bolqarıstanla heç-heçə etmişdi və yalnız Albaniyaya uduzmuşdu. Belədə ortaya sual çıxır: AFFA rəhbərliyi hansı məntiqlə Arif Əsədovu postundan uzaqlaşdırıb yığmanı Fernandu Santuşa tapşırdı? Məğlubiyyətləri sıralamaq, yoxsa 11 oyunda qələbəyə həsrət qalmaq üçün? Santuşu ki milliyə Elşad Nəsirov, Elxan Məmmədov, yaxud Vaqif Sadıqov gətirməyib ki. İndi bəhanəniz nədir? Yenə də günahı AFFA-nın köhnə rəhbərliyinin üzərinə atacaqsınız? Gəldiyiniz ilk gündən olduğu kimi...

16 aydır Azərbaycan futboluna rəhbərlik edənlər heç nə ilə yadda qalmayıblar. Əvvəl camaatın başını aylarla strategiya nağılı ilə qatdınız, milyonlarla dollar pul verib strategiya yazdırdınız. Bəs sonra? İndi strategiyanın heç s-sı da yada düşmür. Siz guya Azərbaycan futbolunu irəli aparacaqdınız. Amma görünən odur ki, futbolumuz irəli yox, geri gedir. Əslində belə olacağı məlum idi. Hazırda AFFA-da, İcraiyyə Komitəsində əsas söz sahibi olanlar bu günə qədər işlədikləri klublarda hansı uğura imza atıblar, futbolumuza hansı faydaları dəyib? 15-20 milyon büdcə ilə Azərbaycan çempionatında üçlüyə düşə bilməyənlərdən futbolumuzu irəli aparmağı gözləmək sadəcə sadəlövhlükdür. Ona görə də bu gün Fernandu Santuş yox, onu milliyə gətirənlər istefa verməlidirlər. İlk növbədə məhz siz getməlisiniz. Heç olmasa, ziyanın yarısından qayıdaq. Əks halda bizi qarşıda daha biabırçı məğlubiyyətlər gözləyir. Fransa öz meydanında İslandiya qədər “rəhmli” olmayacaq...

İBRAHİM