2030-cu ilə kimi “Qarabağ”la...

Bu gün "Qarabağ" futbol klubu ilə “Deloitte” şirkəti arasında tərəfdaşlıq müqaviləsinin imzalanma mərasimi keçirilib.

Futbolxeber.az saytının məlumatına görə, tədbirdə Ağdam klubunun prezidenti Tahir Gözəl və “Deloitte” şirkətinin rəsmisi Nuran Kərimov iştirak edib.

Bildirilib ki, memorandumun əsas məqsədi Ağdam təmsilçisinin inkişafını daha da sürətləndirməkdir.

T.Gözəl dünya təcrübələrini bölüşməkdə "Deloitte" şirkətinin böyük rol oynadığını diqqətə çatdırıb. Onun sözlərinə görə, iki şirkətin dəyərləri üst-üstə düşdüyü üçün tərəfdaşlıqla bağlı qərar qəbul olunub.

N.Kərimov audit-konsaltinq şirkəti olaraq, regionda ilk dəfə idman dünyasının ulduzu olan "Qarabağ"la işbirliyi qurduqlarını söyləyib: "İki lider təşkilat bu gün öz gücünü birləşdirir. Bu, bizim üçün ilk təcrübədir. İlk dəfə paylaşım edəndə azarkeşlər soruşurdular ki, bu, yeni oyunçudur? (gülür) Ola bilsin, bir çoxları şirkətimizin fəaliyyəti barədə məlumatlı deyil".

O, sözləşmə barədə deyib: “Müqavilə 2030-cu ilədək karbon qazından azad olmağın yollarını nəzərdə tutur. Ekspertlər komandası klubun hesabatlılığını artıracaq və göstəricilərin ölçülməsində köməklik göstərəcək. Xidmət ödənişlidir. Lakin çox güzəştli şərtlərlə aparılacaq. Kommunikasiyalarda loqomuz olacaq, amma stadionlarda banner olmayacaq”.