İmad Faraj: “Qol epizodlarında daha öldürücü olmalıyıq”

“Oyun çətin keçdi. Çünki rəqib bütün komanda ilə müdafiə olunurdu. Bu səbəbdən də qarşılaşma ərzində elə də çox epizodumuz olmadı. Yalnız 2-3 dəfə qola yaxın idik. Təəssüf ki, onları da dəyərləndirə bilmədik. Qol epizodlarında daha öldürücü olmalıyıq”.

Futbolxeber.az saytına müsahibəsində bu sözləri “Neftçi”nin hücumçusu İmad Faraj Azərbaycan Premyer Liqasının ikinci turunda “İmişli”yə qarşı keçirilən oyun (0:0) barədə danışarkən deyib.  

Fransız forvard mövsümün startının komandası üçün uğursuz alındığını bildirib: “2 oyunda 4 xal itirmişik. Buna görə də startı heç cür uğurlu adlandırmaq olmaz. İnanıram ki, növbəti matçlarda vəziyyəti düzəldəcəyik. Başqa yolumuz yoxdur”.  

“Problem nədədir?” sualını 26 yaşlı futbolçu belə cavablandırıb: “Deməzdim hansısa problem var. Məşqlərdə daha çox çalışmalıyıq. Eləcə də yaxaladığımız fürsətlərdən daha yaxşı faydalanmalıyıq”.

İ.Faraj cümə günü “Turan Tovuz”a qarşı keçirəcəkləri oyundan da söz açıb: “Rəqib haqda elə də geniş məlumatım yoxdur. Amma bilirəm ki, iddialı komandadır. Biz doğma azarkeşlərimiz önündə oynayacağıq. Ona görə də mütləq fanatlarımızı sevindirməliyik. Qələbə qazanmaqdan başqa yolumuz yoxdur”.

O, Azərbaycan Premyer Liqasının səviyyəsini belə qiymətləndirib: “Açığı, hələ bütün komandaları iş başında görməmişəm. İlk 2 turda qarşılaşdığımız komandalar daha çox arxadan oynayırdılar. Onlar əsasən bizim hücum etməyimizi gözləyirdilər. İstənilən halda liqanın səviyyəsinin yüksək olduğunu düşünürəm. Görünən odur ki, heç bir rəqibə asanlıqla qalib gəlmək mümkün deyil”.

Fərəc Aslanov