Rüstəm Əhmədzadə: “Ümid edirəm ki, bu mövsüm təkcə “Kəpəz”ə qol vurmayacam”

“Sumqayıt”ın hücumçusu Rüstəm Əhmədzadənin Futbolxeber.az saytına müsahibəsi

- Premyer Liqanın ilk turunda “Kəpəz”i 3 cavabsız qolla üstələdiniz. Qələbəni necə şərh edərdiniz?

- Bizim üçün çox yaxşı oyun alındı. Mövsümə uğurlu start verdik. Hər kəs belə başlanğıc arzulayır. İndi bu qələbənin ardını gətirmək lazımdır.

- Qarşılaşmanın komandanız üçün bu cür uğurlu alınacağını gözləyirdiniz?

- Oyuna tam köklənmişdik. Maksimum gücümüzü meydanda qoymuşduq. Qalib gəlmək istəyirdik və buna da nail olduq.

- Matçda hesabı açdığınızı nəzərə alsaq, “Sumqayıt”dakı rəsmi debütunuzun uğurlu alındığını söyləmək olar?

- Əlbəttə. Oyuna çox ciddi hazırlaşmışdım. Qol vurduğum üçün sevincliyəm. Hər matçda komandama faydalı olmaq istəyirəm. Əlimdən gələni edəcəm ki, növbəti matçlarda da “Sumqayıt”ın qələbələrində pay sahibi olum.

- Maraqlıdır ki, ötən mövsüm “Zirə”nin heyətində 2 qol vurmuşdunuz və hər ikisini də “Kəpəz”in qapısına. “Sumqayıt”dakı ilk rəsmi qolunuzu da bu rəqibin qapısından keçirdiniz. Gəncə klubu ilə oyunların sizin üçün belə uğurlu alınmasını nə ilə əlaqələndirirsiniz?

- Bilmirəm (gülür). Bu, sadəcə təsadüfdür. Ümid edirəm ki, bu mövsüm təkcə “Kəpəz”ə qol vurmayacam.

- İstər yoxlama oyunlarında, istərsə də ilk turda fərqləndiniz. Bu, “Sumqayıt”ı seçməklə ən doğru qərarı verməyinizin göstəricisidir?

- “Sumqayıt”da olduğum üçün şadam. Burada yaxşı kollektiv formalaşıb. Məşqçilər korpusu ilə də söhbətimiz olmuşdu. Hər şey yaxşı olacaq.

- Növbəti turda “Qarabağ”la qarşılaşacaqsınız. Uğurlu startın ardını gətirmək nə dərəcədə realdır?

- Hazırlaşacağıq. Maksimum gücümüzü meydanda qoyacağıq ki, çətin görüşdən yaxşı nəticə ilə ayrılaq.

- Ümumiyyətlə, “Sumqayıt”ın cari mövsümdəki hədəfi nədir?

- Turnir cədvəlində bacardığımız qədər yüksək yerlərdə olmaq istəyirik. Lakin indidən nəsə demək çətindir. Hamı əlimdən gələni etsə, bizim üçün hər şey yaxşı olacaq.

Fərəc Aslanov