Samir Abasovun mesajı - PART 2

Dünən “Neftçi” - “Turan Tovuz” oyunundan sonra təşkil edilən mətbuat konfransında flaqmanın baş məşqçisi Samir Abasov yenə diqqətləri üzərinə çəkdi. “Bəzi azarkeşlər "Neftçi"ni ötən turda "Kəpəz"ə qəsdən uduzmaqda ittiham edir...” fikrinə “Mən nədən danışım? Mən bu qədər danışdım, gör nə deyirsiniz... Niyə başqa klublara belə suallar verilmir? Günahımız nədir? Cavab istəyirsiniz? Kameranı söndürün, xanımlar çıxsın, mən danışım” cavabını verən mütəxəssis daha sonra zalı tərk etdi.

Təbii ki, həmişə olduğu kimi, yenə də Abasovun bu hərəkətinə qulp qoyanlar da tapılacaq, haqq qazandıranlar da...

Samir Abasov “Kameranı söndürün, xanımlar çıxsın...” deyəndə, düşündüm ki, ardınca da “işıqları söndürün, seks başlayır” söyləyəcək. Mütəxəssisin “Niyə başqa klublara belə suallar verilmir?” sualı seks qədər olmasa da, həzverici idi. Abasov əjdahadır. Allah onu Azərbaycan mətbuatına çox görməsin. Ən azından əksəriyyətin demədiklərini üstüörtülü şəkildə də olsa, deyir. Necə ki, Sambunun cəzalanmasında olduğu kimi, dünən də üstüörtülü şəkildə sözünü dedi.

And içə bilərəm, amma sübut edə bilmərəm ki, Samir Abasov “başqaları” deyəndə hansı oyunları nəzərdə tuturdu... Əslində, daha əvvəl də demişik, hamı hər şeyi çox gözəl bilir. Kim kimə güzəştə gedir, kim kimə qarşı meydana 90 dəqiqəni yola vermək üçün çıxır və s. Amma min təəssüf ki, əldə əlahəzrət fakt olmadığı üçün susursan...

“Niyə başqa klublara belə suallar verilmir?” – Abasov kimə nə dediyini gözəl bilir...

İBRAHİM