Elvin Camalov: “Neftçi” üçün çempionat bitməyib”

“Neftçi”nin yarımmüdafiəçisi Elvin Camalovun Futbolxeber.az saytına müsahibəsi

- Azərbaycan Premyer Liqasının 26-cı turunda “Turan Tovuz”la bərabərə qaldınız. 1:1-lik heç-heçəni necə şərh edərdiniz?

- Əvvəldən məlum idi ki, hər iki tərəf əzmkar oyun nümayiş etdirəcək. 90 dəqiqə ərzində belə də oldu. Rəqib matçın əvvəlində 10 nəfərlə qaldı. Əslində azlıqda qalan rəqibə qarşı oynamaq heç də asan deyil. Çünki belədə müdafiəyə meyilli oynayırlar. Matç ərzində bir neçə qol epizodu yaratdıq. Sona yaxın hesabda önə keçsək də, üstünlüyümüzü sona kimi qoruya bilmədik. Bu da çox üzücüdür. Bundan nəticə çıxarıb, irəli baxmalıyıq.

- Yəni sözlərinizdən belə çıxır ki, rəqibin qırmızı vərəqə alması “Neftçi”nin heç də xeyrinə olmadı...

- Tam heyətlə oynayanda görüş qarşılıqlı hücumlar şəraitində keçir. Rəqib azlıqda qaldıqdan sonra daha çox müdafiəni düşünməsi normaldır. Qol imkanları yaratmaq üçün çox çalışdıq. İstəyimizə də çatdıq. Sadəcə hesabı qorumaq mümkün olmadı.

- Qələbə hesabını qorumağa nə mane oldu: ani diqqətsizlik, yoxsa arxayınçılıq?

- Ani diqqətsizlik deyərdim. Bir qədər diqqətsizliyə yol verdik və nəticədə qapımızda qol gördük. Halbuki sona qədər diqqətli olmaq lazımdır. Bu, hər bir idman növünə aiddir.

- Hər nə qədər “Neftçi”nin futbolçuları etiraf etməsələr də, görünən odur ki, fikriniz daha çox kubokdadır, nəinki çempionatda. Razısınız?

- Mən bu fikirlə razı deyiləm. Əlbəttə, avrokuboklara yollanmaq baxımından kubokda şansımız daha çoxdur. Lakin çempionatda da turnir cədvəlində bizdən öndə olan komandalara yaxınlaşmağa çalışırıq.

- Lakin xal fərqi çoxdur...

- Bəli, xal fərqi çoxdur. Ötən tur “Kəpəz”ə qalib gəlsəydik və “Turan Tovuz”la matçda 3 xalı əldən verməsəydik, turnir cədvəlində vəziyyətimiz xeyli yaxşılaşardı. Beşinci pillə ilə aramızda xal fərqi cəmi 1 olacaqdı.

- Yəni “Neftçi” üçün çempionat bitməyib?

- Xeyr. İstənilən halda 2-3 tur ərzində vəziyyət dəyişə bilər. Yuxarı pillələrdəki komandalar xal itirdikcə, onlara yaxınlaşmağımız mümkündür. Çempionatda sona qədər mübarizə aparacağıq. Əlimizdən gələni edəcəyik ki, daha üst pillələrdə qərarlaşaq.

İbrahim Cəfərov