“Neftçi”yə qarşı ikili standart

“Neftçi” dünən səfərdə “Kəpəz”ə uduzdu. Cari mövsüm flaqman adına, iddiasına uyğun çıxış etmir. Təsadüfi deyil ki, “ağ-qaralar” Azərbaycan Premyer Liqasında 25-ci oyununda 10-cu məlubiyyətini aldı.  Odur ki, “Kəpəz”ə yenilgi də adi qarşılandı. Baxmayaraq ki, son həftələr “Neftçi”nin mövsümün əvvəli ilə müqayisədə özünə gəldiyini görürük. “Kəpəz”lə matça kimi “ağ-qaralar” son 6 matçdan 5-də qələbə qazanmışdı...

Bəs “ağ-qaralar” dünən niyə uduzdu? Bunun səbəblərindən birini komandanın baş məşqçisi Samir Abasov matçdan sonra təşkil edilən mətbuat konfransında açıqladı: “Qol vura bilmədik. Fürsətlərdən istifadə etmək alınmadı. Hücumçularımız “dişsiz” idilər, epizodlarda baş çıxara bilmədilər. Ələlxüsus da Ağadadaş Salyanski. Ona görə də uduzduq”. Bəli, bu, məğlubiyyətin əsas səbəbidir. Dünən “Neftçi” meydanda həqiqətən də dişsiz görünürdü. Xüsusən də hücum planında...

Amma toxunulası daha bir məqam var. Samir Abasova mətbuat konfransında ünvanlanan bir sual da maraq doğurur: “İntizam Komitəsi "Kəpəz"lə kubok görüşündəki kobudluğuna görə Sambuya iki oyunluq cəza verdi. Düşünmürsünüz ki, "Kəpəz"lə matçdan sonrakı açıqlamanızın bura təsiri oldu?”

Təbii ki, bu sualı ünvanlayan həmkarımız hər hansı iddia ilə çıxış etməyib, əldə fakt olmayanda kimisə birbaşa ittiham etmək də alınmır. Sadəcə ehtimallar üzərində fikir yürüdülür. Lakin sualda həqiqətən də məntiq var.

Birincisi ona görə ki, Sambuya verilən qırmızı vərəqənin haqsız olması öz yerində, iki oyunluq cəza isə daha absurd görünür. Epizodu izləyən hər kəs təsdiqləyər ki, Samir Abasovun dediyi kimi, o epizodda şiddət, qəsdən zərbə endirmək və s. yox idi. Belədə nə üçün “Neftçi”nin aparıcı hücumçusu dünən 2 oyunluq cəzalandı?

Digər bir məqam. Dünən “Kəpəz”in qol vurduğu epizod kifayət qədər mübahisəlidir. Şevroni Mabatşoev həmin anda Rza Cəfərova qarşı kobud oynamır?

Fikrimizcə, burda qapıçıya kobudluq var. Rza və Şevroninin üz-üzə qaldığı epizod qapıçı meydançasının daxilindədir. “Kəpəz”in futbolçusu demək olar ki, “Neftçi”nin qapıçısını tapdalayıb qol vurur. İddia oluna bilər ki, Şevroni Mabatşoev qapıçıya qarşı kobudluq etmir, sadəcə topa zərbə endirir. Ayağını hara çəksin? Bu halda ortaya başqa bir sual çıxır. Çünki birbaşa olmasa da, “Kəpəz”in dünən vurduğu qol müəyyən qədər Bassala Sambanın aldığı qırmızı vərəqəyə bənzəyir. Hər iki halda rəqibə istəmədən belə olsa, təmas var. Bu epizodlarda fərqli qərar qəbul etmək doğru deyil. Ya hər iki epizodda kobudluq var, ya da heç birində. Yəni Sambaya qırmızı vərəqə göstərilirsə, o məntiqlə “Kəpəz”in qolundan öncə də kobudluq var. Yox, Mabatşoevin qolu təmizdirsə, o halda Sambaya niyə qırmızı vərəqə göstərildi? 

Futbolxeber.az