AFFA-nın “ədaləti” - yalnız cərimə kəsmək?

AFFA İntizam Komitəsinin “Turan Tovuz” klubuna 20 000 manat cərimə tətbiq etməsi bir daha göstərir ki, assosiasiya real problemləri həll etmək əvəzinə, tənqidi susdurmaqla məşğuldur. Klubun bəyanat yayaraq AFFA və Peşəkar Futbol Liqasının nüfuzuna xələl gətirdiyi iddia olunur. Amma burada sual yaranır: nüfuzu aşağı salan həqiqətən “Turan Tovuz”un bəyanatı, yoxsa AFFA-nın qeyri-şəffaflığı və ikili standartlarıdır?

Futbol ictimaiyyəti yaxşı bilir ki, Azərbaycan çempionatında oyunların idarə olunması, klublara qarşı münasibət və qəbul edilən qərarlar çox vaxt qeyri-müəyyən və subyektiv olur. AFFA klubları ədalətli idarəçiliklə deyil, sanksiyalarla nəzarətdə saxlamağa çalışır. Görünür, hər hansı bir klub rəsmi mövqeyi tənqid edirsə, ona qarşı dərhal cəza tədbiri tətbiq edilir. Bəs şəffaflığı təmin etmək üçün AFFA özü hansı addımları atır?

Əgər “Turan Tovuz” oyundan bir gün əvvəl yox, məhz oyun günü Şamaxıya getmək qərarı versəydi və “CBC Sport” telekanalı kimi əlverişsiz hava şəraitini və yol durumunu bəhanə edib geri qayıtsaydı, AFFA-nın qərarı necə olardı?

Əgər klub məsuliyyət hiss edir və bir gün öncədən oyunun keçiriləcəyi məkana gedirsə, AFFA da zəhmət çəkib bir gün öncədən ora çəkiliş qrupu göndərməliydi.

“CBC Sport” telekanalının texniki imkanlarının olub-olmaması (əlavə canlı yayım maşınının mövcudluğu və ya yoxluğu) “Turan Tovuz” klubunu maraqlandırmır. Klubu maraqlandıran odur ki, oyun canlı yayımlansın və VAR tətbiq olunsun. Üstəlik, AFFA rəhbərliyi havanın qarlı olacağını öncədən bilirdi. Buna görə də qabaqlayıcı tədbirlər görə bilərdi. Məsələn, AFFA-nın vitse-prezidenti Balakişi Qasımov eyni zamanda İctimai TV-nin rəhbəridir. “CBC Sport” telekanalının texniki imkanlarını nəzərə alaraq, bu sahədə təcrübəli bir şəxs kimi oyunun canlı yayımının təşkili üçün alternativ həll yolları fikirləşə bilərdi. İcarəyə canlı yayım maşını götürüb 1-2 gün öncədən Şamaxıya göndərə bilərdi. Amma AFFA öz təşkil etdiyi çempionatın yayımına qeyri-ciddi yanaşaraq klubun haqq səsini boğmağa çalışır.

Belə çıxır ki, əvvəlki rəhbərliyin zərgər dəqiqliyi ilə işləyib hazırladığı və son 10 ildə canlı yayımla bağlı problemin aradan qaldırıldığı bir vaxtda, bütün oyunların canlı yayımının təşkil edildiyi halda yeni komanda bizi ölkə futbolunun 1990-2000-ci illərin canlı yayım probleminə qaytararaq nostalji hisslər yaşatmaq üçün çalışır...

Bütün bu olanlar onu deməyə əsas verir ki, klub bəyanat yaymaqla təkcə öz hüququnu qorumaqla qalmayıb, eyni zamanda pərdəarxasında baş verən proseslərdən xəbərdar olduğunu incə mesajla ictimaiyyətə çatdırmağa çalışıb. Görünür, AFFA-nı qıcıqlandıran məqam da məhz budur. Ona görə də cərimələməkdən başqa bir mexanizm tətbiq edə bilmir.

P.S. Sən düz 3 il Ehtiram Quliyevin zəhləsini tök, klubu himayayə götürməsi üçün xahiş elə, minnətçi düş, sonda da adam haqq səsini çıxardanda cərimədən yüklə... Ona görə iş adamları, klublara sponsorluq etmək istəmirlər də. Bu münasibəti görən hansı iş adamı bundan sonra Azərbaycan futboluna yaxın durar?

TAĞI