Boqomolski: “Bu, bizim yerimiz deyil”

“Çətin oyun alındı. 90 dəqiqə ərzində meydanda xeyli mübarizə var idi. Elə də çox qol epizodları olmadı. Təəssüf ki, qələbə hesabını qoruya bilmədik”.

Futbolxeber.az saytına müsahibəsində bu sözləri “Neftçi”nin hücumçusu Yeqor Boqomolski Azərbaycan Premyer Liqasının XVIII turunda “Turan Tovuz”a qarşı keçirilən oyun (1:1) barədə danışarkən deyib.  

Belaruslu hücumçu qeyd edib ki, “Neftçi” turnir cədvəlində daha yuxarı yerlərdə olmalıdır: “Bu, bizim yerimiz deyil. Daha yuxarılarda olmalıyıq. İnanıram ki, vəziyyəti dəyişəcəyik. Mövsümün ikinci yarısına yaxşı hazırlıq keçəcəyik. Üçüncü və dördüncü dövrələrdə daha uğurlu çıxış edəcəyimizə, qələbələr qazanacağımıza inanıram”.  

24 yaşlı futbolçu komandaya mövsümün gedişində qoşulan baş məşqçi Samir Abasovun işini çətin olduğunu bildirib: “Samir Abasov komandaya çox çətin vəziyyətdə gəldi. Ona qədər qələbəmiz yox idi. Bu vəziyyətdə komandanı qalibiyyət yoluna qaytarmaq heç də asan deyildi. Düşünürəm ki, zamanla hər şey daha yaxşı olacaq”.

“Mövsümün son iki dövrəsində daha yaxşı çıxış etmək üçün “Neftçi”də nələr dəyişməlidir?” sualını Y.Boqomolski belə cavablandırıb: “Bu barədə mən heç nəyə deyə bilmərəm. Bununla bağlı baş məşqçimiz danışsa, daha yaxşı olar. Əminəm ki, o, lazımi qərarları verəcək və bütün bunlar komandamıza faydalı olacaq”.

Fərəc Aslanov