“Qələbəni atama həsr edirəm”

“Neftçi” hər zaman “Neftçi”dir. Bu rəqibə qarşı oynamaq hər bir futbolçuya zövq verir. Bu matç hər bir oyunçunun qiyməti, karyerası üçün önəmlidir. Futbolçular bunu dərk edirdilər. Onlara təşəkkür edirəm. 90 dəqiqə ərzində sübut etdik ki, rəqibdən heç də zəif deyilik. Futbolçularıma təşəkkür edirəm. Onlar üçün böyük addım olacaq. Demək ki, komandamız futbol oynaya bilir, futbolçuların potensialı üst səviyyədədir. Bu qələbə bizi ancaq irəliyə doğru aparacaq”.

Futbolxeber.az saytının məlumatına görə, bu sözləri “Sumqayıt”ın baş məşqçisi Vaqif Cavadov Azərbaycan Premyer Liqasının XVI turunda “Neftçi”ni 2:0 hesabı ilə məğlub etdikləri oyundan sonra deyib.

O, həmkarı Samir Abasovun “Sumqayıt” həminki komandadır və heç nə dəyişməyib” fikrinə belə münasibət bildirib: “Samir müəllimin dediyinə özünüz cavab versəniz, daha yaxşı olar. Bu haqda danışmağım doğru olmazdı”.

Cavadov ailəlikcə “Neftçi”li olduqlarını vurğulayıb: “Kaş ki, atam bugünkü oyunu görərdi. Karyeram ərzində necə yanımda olubsa, indiki uğuruma da çox sevinərdi. Baxmayaraq ki, “Neftçi”lidir. Onun olmaması mənim üçün çətindir. “Neftçi” üzərində qələbəni atama həsr edirəm. Onun üzərimdə böyük əməyi var”.

“Sumqayıt”ın çalışdırıcısı vurğulayıb ki, bu heyətlə də futbol oynamaq mümkündür: “Rəqibimiz “Neftçi” idi. Onlara qarşı oynayırdıq. Qalib gəlmək istəyirdik. Sübut etmək etdi ki, heç kimdən zəif deyilik. Bu heyətlə də futbol oynamaq olar. Baş məşqçi ilə bağlı heç bir motivasiya ola bilməzdi. Bütün oyunlara necə hazırlaşmışdıqsa, bugünkü matça da eyni motivasiya ilə çıxmışdıq. Sadəcə “Neftçi” həmişə “Neftçi”dir. Onlara uğurlar arzulayıram. Bu klubu yuxarı pillələrdə görmək istəyərdim”.

Mütəxəssis bu gün komandasının daha istəkli olduğunu söyləyib: “Zirə”, “Şamaxı” və “Neftçi”yə qarşı oynadığımız demək olar ki, eynidir. Sadəcə bu gün daha çox istək var idi. Bu istəyə görə Allah da bizə qələbəni bəxş etdi”.

Cavadov qış “transfer pəncərəsi” barədə da danışıb: “Təbii ki, məşqçilər korpusu bu haqda materiallar toplayırlar. Biz hər oyun maksimum nəticə üçün oynayırıq. Qışda pauza olacaq. Digər futbolçular haqda düşünməyə vaxtımız var. Bugünkü gündə heyətimdə hansı futbolçular varsa, çalışacam ki, onlarla işimi davam etdirim”.

“Klub prezidenti olsaydınız, 7 oyundan 4 qələbə qazanan baş məşqçinin müvəqqəti statusunu götürüb, daimi müqavilə bağlayardınız?” sualını Vaqif Cavadov belə cavablandırıb: “Bu, mənə aid olan sual deyil. Məşqçi olaraq “Sumqayıt”ın yetirməsiyəm. Rəhbərlik mənə inanıb və baş məşqçi postunu etibar etdi. Sabah deyərlər ki, bugünkü işə görə təşəkkür edirik, amma başqa məşqçi istəyirik. Bu, onların istəyi olacaq. Ya əvəzedici heyətə dönəcəm, ya da baş məşqçi kimi işimə davam edəcəm”.