Elmar Baxşıyevdən qələbə şərhi: “Bu, komandanın maksimumu deyil”

“Oyun düşündüyümüz kimi ağır alındı. Hər iki komanda meydanda yaxşı mübarizə apardı. Yolumuza davam edirik, qarşıdakı oyuna hazırlaşağıq. Komandama təşəkkür edirəm, uşaqlar yaxşı performans göstərdilər. Zədəli futbolçularımız bizə qoşulandan sonra daha yaxşı oyun nümayiş etdirəcəyik”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının III turundan təxirə salınmış “Zirə” ilə oyundan sonra deyib.

O, 1:0 hesablı qələbəni belə şərh edib: “Çalışırıq ki, heç bir rəqibə qarşı ikinci nömrə ilə oynamayaq. Bizim öz dəst-xəttimiz var. İkinci hissədə hücumda kreativliyi artırdıq”.

Elmar Baxşıyev Qara Qarayevin performansını belə dəyərləndiririb: “Sərəncamımda olan bütün futbolçulara güvənirəm, o cümlədən Qaraya da. Biz klub olaraq ona dəstək oluruq. Qara da bu dəstəyi qaytarmalıdır. O, böyük xaraktera sahib olan futbolçudur. Qara bu gün komandanın bir parçası idi. Getdikcə daha yaxşı olacaq”.

Mütəxəssis Bəxtiyar Həsənalızadənin durumuna da aydınlıq gətirib: “Mikro zədəsi var. Qarşıdakı günlərdə dəqiq biləcəyik”.

“Araz-Naxçıvan”ın çalışdırıcısı “Avrokuboklara vəsiqə qazanmaq şansını necə dəyərləndirirsiniz?” sualını belə cavablandırıb: “Çoxları bizi aşağı pillələrdə görürdü. Amma bu, komandanın maksimumu deyil. Qarşıdakı rəqibi düşünürük. Avrokuboklara vəsiqə qazansaq, yaxşı olar”.