Bəhlul Mustafazadə: “Ümidliyik”

“Sabah bizi gərgin və maraqlı oyun gözləyir. Ümidliyik. Hədəfimiz Çempionlar Liqasının qrup mərhələsinə yüksəlməkdir. Oyuna yaxşı hazırlaşmışıq. Sabah əlimizdən gələni edəcəyik ki, mərhələni keçək”.

Futbolxeber.az saytının məlumatına görə, bu sözləri “Qarabağ”ın müdafiəçisi Bəhlul Mustafazadə deyib.

Zaqreb “Dinamo”suna qarşı keçiriləcək UEFA Çempionlar Liqasının pley-off mərhələsinin cavab matçından öncə təşkil olunan mətbuat konfransına qatılan müdafiəçi Ağdam klubunun müdafiə xəttinin tənqid olunmasına belə münasibət bildirib: “Tənqidləri normal qarşılayırıq. Qol buraxırıqsa, müdafiənin də səhvi var. Çalışırıq ki, səhvləri təhlil edib, nəticə çıxaraq. Təzyiq yaratdığını düşünmürəm. Çünki bu da futbolun bir parçasıdır. Əsas odur ki, həmin səhvlərdən nəticə çıxaraq və növbəti oyunlarda təkrarlamayaq”.

B.Mustafazadə üzərlərində hər hansısa təzyiq hiss etmədiklərini bildirib: “Artıq bir neçə turdur ki, Çempionlar Liqasında oynayırıq. Sakitik. Təcrübəmiz var. Hər kəs sakitdir, hamı inanır. Ən önəmlisi də, daha sakit olmaqdır. Özüm də yaxşıyam. Daha yaxşı oyun göstərməyə çalışacağıq”.