Azərbaycan futbolunu dildə yox, əməldə düşünmək

Qarşıdakı mövsümdə yenidən II Liqada yarışacaq “Dinamo” Azərbaycan futbolunun təkcə bugününü deyil, gələcəyini də düşünür. Əslində, bu iddia ilə əksər klublar çıxış edir. Amma bir var bunu sözdə demək, bir də var əməldə isbatlamaq. Necə ki, “Dinamo” belə edir.

II Liqada yarışmasına və sponsorsuz olmasına baxmayaraq, “Dinamo” uşaq futboluna böyük diqqət ayırır. Belə ki, yeni mövsümdə paytaxt klubu təkcə II Liqada deyil, eləcə də U-19, U-17, U-16 və U-15 Liqasında da mübarizə aparacaq. Artıq “Dinamo”nun 19, 17, 16 və 15 yaşlılardan ibarət komandaları formalaşdırılıb və kollektivlər çempionata hazırdırlar. Bu baxımdan “Dinamo” aşağı liqada istisna təşkil edir. Çünki istər I, istərsə də II Liqa klubları arasında bu qədər aşağı yaş qrupu olan iştirakçı yoxdur.

“Dinamo”nun işə peşəkar yanaşması heç də səbəbsiz deyil. Klubun İdarə Heyətinin sədri uzun illər Azərbaycan futbolunda rəhbər şəxslərdən olmuş, iki dəfə AFFA İcraiyyə Komitəsinin üzvü seçilmiş Yaşar Seyidovdur. Məhz Seyidovun futbol adamı olması “Dinamo”nun fəaliyyətində də özünü göstərir.

Seyidov “Dinamo” ilə yanaşı, “İsgəndər Cavadov adına Bakı Futbol Akademiyası”na da rəhbərlik edir. Bu akademiyanın da 4 komandası aşağı yaş qrupu üzrə ölkə çempionatlarında çıxış edəcək. Söhbət U-10, U-12, U-13 və U-14 liqalarından gedir. Daha bir kollektiv isə Region Liqasına qoşulacaq.

“Dinamo”nun əsas komandasını da nəzərə alsaq, deməli, 10 komanda müxtəlif turnirlərə qatılacaq. Bu göstəriciyə isə nəinki I və II Liqa, hətta bəzi Premyer Liqa klubları da həsəd apara bilər. Bəzi özünə peşəkar deyən klubların əvəzedici liqanın ləğvini arzuladığı məqamda “Dinamo”nun uşaq futboluna bu qədər diqqət ayırması təqdirəlayiqdir. Bir daha qeyd edək ki, bütün bu işləri “Dinamo” rəhbərliyi heç bir sponsor olmadan, məhdud büdcə ilə görür. Kluba himayətdarlıq edən olsa, görüləcək işlərin masştabı indikindən qat-qat geniş olar və Azərbaycan futbolu üçün onlarla futbolçu yetişər. Yaxın keçmişdə məhz Yaşar Seyidovun rəhbərlərindən biri olduğu “Bakı” Futbol Klubunun uşaq futbolu ilə bağlı gördüyü işlər bu gün də azarkeşlər, futbol ictimaiyyəti tərəfindən xatırlanır. Bir neçə il ərzində düzgün qurulan işlər sayəsində “Bakı” Azərbaycan futboluna onlarla istedad bəxş edib. Təsadüfi deyil ki, müxtəlif vaxtlarda bu klubun 72 yetirməsi Azərbaycan milli komandalarında forma geyib.