Nikola Vuynoviç: “İkinci hissədən yox, əvvəldən yaxşı oynamalıyıq”

“Oyuna pis başladıq. Rəqib ilk dəqiqələrdən pressinq tətbiq etməklə üstünlüyü ələ aldı”.

Futbolxeber.az saytına müsahibəsində bu sözləri “Sumqayıt”ın hücumçusu Nikola Vuynoviç Azərbaycan Premyer Liqasının ikinci turunda “Turan Tovuz”a 0:1 hesabı ilə uduzduqları oyun barədə danışarkən deyib.

Monteneqrolu futbolçu bildirib ki, ikinci hissədə nə qədər çalışsalar da, məğlubiyyətdən qaçmaq mümkün olmayıb: “İlk hissədə zəif təsir bağışladıq. Rəqib də bundan faydalanmaqla hesabı açdı. Sonradan toparlandıq. Fasilədən sonra daha yaxşı oynadıq. Qol vurmaq üçün fürsətlərimiz də var idi. Lakin təəssüf ki, onlardan yararlana bilmədik. Nə qədər çalışsaq da, məğlubiyyətdən qaçmaq mümkün olmadı”.

O, bir qədər zamana ehtiyac duyduqlarını vurğulayıb: “Deməzdim ki, komandada qeyri-stabillik var. Sadəcə mövsümün əvvəlidir. Heyətdə yeni futbolçular var. Bir-birimizə uyğunlaşmaq üçün zamana ehtiyac duyuruq. Düşünürəm ki, turlar keçdikcə daha yaxşı oynayacağıq”. 

N.Vuynoviç növbəti turda “Səbail”ə qarşı keçirəcəkləri matç barədə də danışıb: “Səbail”in “Neftçi” ilə oyununu izləmişəm. Evdə oynayacağıq. Doğma azarkeşlərimiz önündə keçirdiyimiz hər matçda qələbə qazanmalıyıq. Sadəcə bunun üçün ikinci hissədən yox, əvvəldən yaxşı oynamalıyıq. Bu halda nəticə də gələcək”.

Fərəc Aslanov