Dəyişən-dəyişməyən “Neftçi”

Roman Qriqorçuklu, Ramil Şeydayevli, Rüstəm Əfsərlili “Neftçi”... Ərzurum toplanışı zaman qazanılan qələbələr azarkeşlərdə ümid yaratmışdı. Əlbəttə, yoxlama oyunları ilə rəsmi görüşləri müqayisə etmək olmaz. Amma qələbə istənilən halda qələbədir və hər zaman xoşdur...

Bütün bunları nəzərə alaraq ilk turda “ağ-qaralar”ın necə təsir bağışlayacağı böyük maraq doğururdu. Mənim kimi çoxları üçün də ilk turun ən maraqla gözlənilən matçı “Neftçi” - “Turan Tovuz” idi. İrəli gedərək deyim ki, bol qollu startdan sonra (“Araz-Naxçıvan” - “Qarabağ” - 1:4) dünən “Neftçi Arena”da sönük 90 dəqiqəyə şahidlik etdik. Meydanda daha çox mübarizə gedirdi, gözəl, texnikalı oyundan əsər-əlamət yox idi. Qazonun durumu da texnikalı oyuna imkan vermirdi. “Çərçivə”yə endirilən zərbələrin və qol epizodlarının sayı bir əldəki barmaq sayından artıq olmazdı. “Neftçi” yalnız sona yaxın fəallaşdı. Bu zaman “ağ-qaralar” həm rəqib qapısı qarşısında təhlükə yaradırdı, həm də “Turan Tovuz” üçün əks-hücum şansı yaranırdı. Sondakı təzyiqə baxmayaraq, rəqib qapısına yol tapmaq heç cür mümkün olmadı və beləcə, Roman Qriqorçuklu “Neftçi”nin debütdəki qazancı 1 xal oldu.

Təbii ki, ilk turdakı heç-heçəni faciəyə çevirmək olmaz. Çünki mövsümün startıdır və istənilən komandanın ideal da olmasa, formasını 70-80 faiz bərpa etməsi üçün bir qədər zamana ehtiyac var.

Yeni transferlərdən Edvin Kuç və Andrey Ştoqrin ilk matçdan özünü yaxşı tərəfdən göstərdi deyə bilərik. Xüsusən ukraynalı hücumçu seçilirdi. Əminliklə demək olar ki, Ştoqrin qısa zamanda “ağ-qaralar”ın aparıcı üzvlərindən birinə çevriləcək. Lakin digər yeni transfer Ramil Şeydayev meydanda olduğu müddətdə ümidverici nə iləsə yadda qalmadı. Eyni sözləri kapitan Emin Mahmudov barədə də demək olar. 33 yaşlı yarımmüdafiəçinin meydanda varlığı ilə yoxluğu bilinmirdi. Hətta epizodların birində Kristian da Silva “Neftçi”nin kapitanını daşıdığı sarğıya yaraşmayacaq tərzdə elə geridə qoydu ki, sanki qarşısında illərin təcrübəlisi yox, 15 yaşlı yeniyetmə idi... İstər Ramil, istər Emil tezliklə bəslənən ümidləri doğrultmalıdılar. Əks halda çətin olacaq. Həm özləri, həm də “Neftçi” üçün.

Meydandakı yenilənmiş “Neftçi” haqda çox da müsbət fikirlər səsləndirə bilməsək də, meydandan kənardakı “Neftçi”nin “f5” olunduğu hiss edilirdi. Bunda isə yenidən flaqmana geri dönən Rüstəm Əfsərlinin rolu şübhəsizdir. İstər media sektordakı stolların yenilənməsi, istərsə də “Neftçi”nin futbolçularının matçdan sonra miks-zonadan keçməsi mətbuatın işini xeyli asanlaşdırır. Daha əvvəlki kimi futbolçular oyundan sonra qarajdan getmirlər... Düzdür, azarkeş üçün “Neftçi”nin mətbuat xidmətində görülən işlər əhəmiyyətsiz ola bilər. Çünki hər birimiz bilirik ki, azarkeşi komandanın nəticəsi maraqlandırır. Oyunu udmayandan sonra digər məsələlər ikinci plana keçir. Amma sırf mətbuat nümayəndələrinin rahatlığı üçün atılan addımları qeyd etmək də bizim vəzifə borcumuzdur.

İbrahim Cəfərov