PFL rəsmilərinin son durumu açıqlandı: “Hər ikisində müsbət irəliləyişlər var”

Ötən il ağır qəzaya uğrayan Peşəkar Futbol Liqasının (PFL) prezidenti Elxan Səmədov və vitse-prezident Aslan Şahgəldiyevin son durumu açıqlanıb.

Futbolxeber.az saytının məlumatına görə, bu barədə Azərbaycan Premyer Liqasının 2024/25 mövsümünün püşkatma mərasimində Peşəkar Futbol Liqasının prezidenti vəzifəsini müvəqqəti icra edən Elgiz Abbasov bildirib.

O qeyd edib ki, E.Səmədov artıq ayağa qalxıb: “Hazırda həm Elxan müəllimin, həm də Aslan müəllimin müalicəsi davam edir. Hər ikisində müsbət irəliləyişlər var. Elxan Səmədovun durumu ilə bağlı tibbi dinamik irəliləyiş hiss olunmaqdadır. Artıq ayağa qalxıb, addımlar atmağa başlayıb. Allahın köməkliyi ilə ən qısa zamanda bizim aramızda olacaq”.

E.Abbasov Aslan Şahgəldiyevin müəyyən fasilələrlə iş prosesinə cəlb olunduğunu vurğulayıb: “Aslan müəllimin durumunda da müsbət dinamika sezilir. Onun müalicəsi ev şəraitində davam edir. Müəyyən fasilələrlə iş prosesinə cəlb olunur, bəzən işə gəlir-gedir. Mühitə yenidən adaptasiya olunur. İnanırıq ki, tezliklə tam gücü ilə işə bağlayacaq. Bizə göstərdiyiniz mənəvi dəstəyə görə hər birinizə təşəkkürümüzü bildirik”.