Erik Sorqa: “Sumqayıt” üçün avrokuboklara vəsiqə çox önəmli idi”

"Sumqayıt”ın hücumçusu Erik Sorqa komandasının UEFA Konfrans Liqasına vəsiqə qazanmasını şərh edib.

Futbolxeber.az saytına açıqlamasında o bildirib ki, avrokuboklara vəsiqə qazanmaq “Sumqayıt” üçün çox vacib idi: “Hisslərim inanılmazdır. Bizim üçün avrokuboklara vəsiqə çox önəmli idi. Həlledici matçda qələbə qolunun müəllifi olmağım sevincimi daha da artırır. Xoşbəxtəm, çünki biz Avropaya gedirik”.

Estoniyalı forvard qazanılan uğurda sumqayıtlı azarkeşlərin də rolunun olduğunu söyləyib: “Azarkeşlərə minnətdaram. Bizə inanılmaz dəstək verdilər. Bu uğurda onların da payı var. Xüsusən son ev oyunlarında fanatlar möhtəşəm idilər. Lakin istərdim ki, avrokuboklarda “Sumqayıt” azarkeşləri bizi daha da güclü şəkildə dəstəkləsinlər”.

“Sumqayıt” avrokuboklar nə qədər irəli gedə bilər?” sualını E.Sorqa belə cavablandırıb: “Daha çox çalışmalı, daha yaxşı oynamalıyıq. İstərdik ki, Konfrans Liqasında da irəli gedək. Amma təbii ki, rəqibin kimliyindən də çox şey asılıdır”.

Fərəc ASLANOV