Kilan Lebon: “Gümüş medallara yiyələnmək “Neftçi” üçün prioritetdir”

“Neftçi”nin yarımmüdafiəçisi Kilan Lebonun Futbolxeber.az saytına müsahibəsi

- Uzun fasilədən sonra “Neftçi” 5 qollu qələbə qazandı...

- Matç bizim leyhimizə oldu. Baxımlı oyun sərgilədik və 5:1 hesablı layiqli qələbə qazandıq. "Qarabağ"a böyük hesablı məğlubiyyətdən sonra bu, bizim üçün olduqca yaxşı geridönüş oldu.

- Əvvəlki matçlardakı qeyri-stabil çıxışı nəzərə alsaq, "Kəpəz" üzərində bu hesablı qələbə sizin üçün gözlənilməz olmadı?

- Qalib gəlsək də, çətin oyun olacağı gözlənilən idi. Məqsədimiz 5 qol vurmaq deyildi. Sadəcə əlimizə düşən fürsətləri düzgün dəyərləndirdik.

- Qollarda sizin də payınız oldu. Öz çıxışınızdan razı qaldınız?

- Yaxşı oyun keçirdim. Bəli, çıxışımdan razı qaldım. Belə davam etmək istəyirəm. Qarşıda bizi son 2 turun matçları gözləyir.

- Hazırkı məqamda "Neftçi"nin avrokuboklara yollanmaq şansını necə dəyərləndirirsiniz?

- Qarşıdakı 2 oyun komandamız üçün həlledicidir. Hər iki matçı 3 xalla tamamlamaq istəyirik. Bizi çətin oyunlar gözləyir. “Səbail” və “Sabah”la qarşılaşmalar xüsusi əhəmiyyətə malikdir.

- Yəni hədəf dəyişməyib, ikinci olmaq istəyirsiniz?

- Əlbəttə, hədəfimiz indiki halda maksimumu qazanmaqdır. Hazırda gümüş medallara yiyələnmək “Neftçi” üçün prioritetdir.

- Növbəti turda qarşılaşacağınız "Səbail"lə matçdan gözləntiləriniz nədir?

- Çətin oyun olacaq. Onların meydançası nisbətən kiçikdir. Süni ot örtüyü də bizə əlavə çətinliklər yaşadacaq. Rəqibin də təzyiqi olacaq. Bütün bunları nəzərə alaraq söyləmək olar ki, bizi ağır qarşılaşma gözləyir.

Azad NURİYEV