Stefan Aka: “Hakim səhvləri oyunun taleyini həll etdi”

“Zirə”nin müdafiəçisi Stefan Akanın Futbolxeber.az saytına müsahibəsi

- “Qarabağ”dan alınan məğlubiyyəti (0:1) necə şərh edərdiniz?

- Yaxşı oyun alındı. Matça heç də pis başlamamışdıq. Sadəcə birinci hissədə qapımıza verilən penalti hər şeyi korladı. Fikrimcə, orda penalti yox idi. İkinci hissədə çox cəhd etdik ki, oyunun gedişatını dəyişək. Təəssüf ki, bunu bacarmadıq. Düşünürəm ki, artıq qarşıdakı görüşləri düşünməliyik. Son iki matça fokuslanıb, 6 xal qazanmalıyıq.

- Demək olar ki, hakimin bir səhvi matçın taleyini həll etdi?

- Əlbəttə, belə deyə bilərik. Çünki oyun ərzində “Qarabağ”ın başqa real qol epizodu olmadı. Hətta mən deyərdim ki, Kulaçın epizodunda rəqibin qapısına penalti verilməli idi, amma hakim fərqli qərar qəbul etdi. Bütün bu səhvlər də matçın taleyini həll etdi.

- Bu gün “Sumqayıt” və “Sabah” qələbə qazanacağı halda, “Zirə” beşinci pilləyə düşə bilər. Bu baş verərsə, son 2 turda hansı komandaya, hansı oyuna ümid edəcəksiniz?

- Məncə, bugünkü nəticələr barədə çox düşünməməliyik. Əksinə, son iki matçımıza fokuslanmalıyıq. Həmin 6 xal bizi Avropaya aparacaq. “Sabah”, yaxud “Sumqayıt” qalib gəlsə belə, bu, ciddi fərq etmir. Biz daha çox öz oyunlarımızı düşünməliyik.

- Mövsümü ilk dördlükdə başa vura bilməsəniz, ümid qalacaq finala. “Zirə” həlledici görüşdə “Qarabağ”ı üstələməyə qadirdir?

- Bu barədə düşünmək belə istəmirəm. Önümüzdə iki oyun var. Əlimizdən gələni etməliyik. Komandamıza inanıram. Əminəm ki, bütün gücümüzü meydanda qoyub qalib gələcəyik. Yox, dediyiniz kimi, dördlüyə düşə bilməsək, toparlanıb tam gücümüzlə finalda mübarizə aparmalıyıq. “Qarabağ”a qarşı pis oynamadıq. Bir qədər də artırıb daha layiqli mübarizə aparmaq mümkündür. Lakin indiki halda yalnız və yalnız son iki matça köklənməliyik.  

- Əksər Avropa ölkələrindən fərqli olaraq, Azərbaycanda kubokun finalı çempionat bitdikdən sonra keçirilir. Bununla bağlı nə deyə bilərsiniz?

- Əslində, yaxşı olardı ki, Azərbaycanda da əksər Avropa ölkələri kimi kubokun finalı çempionat bitməmiş keçirilərdi. Amma bu, təşkilatçıların qərarıdır və hörmətlə yanaşmalıyıq. Gələcəkdə bu məqam nəzərə alınsa, fikrimcə, daha yaxşı olar.

İbrahim CƏFƏROV