Marko Yankoviç: “Hər oyunda 3-5 qol vurmağa ehtiyacımız yoxdur”

“Qarabağ”ın yarımmüdafiəçisi Marko Yankoviçin Futbolxeber.az saytına müsahibəsi

- Azərbaycan Premyer Liqasının 35-ci turunda “Zirə” üzərində qazanılan qəbələni (1:0) necə şərh edərdiniz?

- "Zirə"yə qarşı ağır oyun keçirdik. Qarşımızda avrokuboklara vəsiqə qazanmaq və çempionatda gümüş medallar uğrunda mübarizə aparan bir rəqib var idi. Onlar inamlı çıxış etdilər. Matçın əvvəlində çox əziyyət çəkdik. Ona görə bəzi epizodlarda aqressiv idik. Amma lazım olan qolu vurub yekunda 3 xal qazandıq. Bu, bizim üçün önəmli olanıdır.

- Əksər matçlardan fərqli olaraq “Zirə” ilə görüşdə qolları sıralamaq mümkün olmadı. Bunu nə ilə izah etmək olar?

- Düşünürəm ki, hər oyunda 3-5 qol vurmağa ehtiyacımız yoxdur. Hər qarşılaşma fərqli keçir. Bu, rəqibdən də asılıdır. "Zirə" bizə qarşı, xüsusilə müdafiədə etibarlı oynadı. Rəqib futbolçular birə-bir epizodlarda yaxşı oyun nümayiş etdirirlər. Çoxlu şans əldə etsək də, düzgün istifadə etmədik. Ona görə də bir qolla kifayətləndik.

- Öz çıxışınızdan nə dərəcədə razı qaldınız?

- Həmişə öhdəliyimə düşəni etməyə çalışıram. Bu gün də fərqli nəsə olmadı. Oyundan oyuna öz mövqeyimdə daha yaxşı çıxış etmək istəyirəm. Çünki təcrübə qazanmaq önəm daşıyır.

- Artıq qızıl medalları təmin etmisiniz. Bu məqam oyunlara köklənməyinizə mane olmur?

- Çempion olsaq da, hər oyunda qələbə qazanmalıyıq. Baş məşqçimiz də bizdən bunu tələb edir.

- Son zamanlar adınız tez-tez digər klublarla yanaşı hallanır. Sizi növbəti mövsümdə də “Qarabağ”da görə biləcəyik?

- Hazırda başqa yerli və ya xarici klublarla danışıqlar aparmıram. "Qarabağ"la müqaviləm var. Burada özümü sübut etmək istəyirəm.

- Növbəti matç "Turan Tovuz"a qarşı olacaq. Bu qarşılaşmadan gözləntiləriniz nədir?

- Bu görüşə hazırlaşmaq üçün olduqca az vaxtımız var. Hədəf dəyişməz olaraq qalır. Hər oyunda qələbə qazanıb Azərbaycan çempionatını qələbələrlə ilə başa vurmaq istəyirik.

Azad NURİYEV