Qurban Qurbanovdan qələbə şərhi

“Bu gün bərk komandaya qarşı oynayırdıq. Hansı ki, meydanda yaxşı mübarizə aparırdılar. Birəbir mübarizələri uduzmayan rəqibə qarşı oynadıq. Qələbə olsa da, asan deyildi. Futbolçularım çox əziyyət çəkdilər. Tam öz oyunumuzu istədiyimiz kimi göstərə bilmədik. Futbolçular qələbə üçün xeyli güc sərf etdilər. "Zirə"yə uğurlar arzulayıram”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan Premyer Liqasının 34-cü turunda “Zirə”yə 1:0 hesabı ilə qalib gəldikləri oyundan sonra deyib.

Mütəxəssis Juninyonun son zamanlardakı hərəkətli görünməsinə belə aydınlıq gətirib: “Hərəkətində geriləmə var. Məşqçi olaraq bunu başa düşürəm. Həm dediyiniz fikirlər, həm də oyunlara motivasiya etmək asan deyil. Nə qədər futbolçuları motivasiya etsək də, onlar özləri də özlərini motivasiya etməyi bacarmalıdırlar. Görünür, tam istədiyim kimi alınmır. Bəlkə də, komandaya tam uyğunlaşmayıb. Bizim rejimdə, məşq proseslərimizdə, hər oyuna yanaşmağımızda, ola bilər tam dərk edə bilməyib. İnanın ki, hər şey yaxşılığa doğru gedir. Özü ilə də söhbətimiz olub. Gələn il daha yaxşı Juninyo görmək istəyirik. İnanıram ki, onunla ilə birlikdə bacaracağıq ki, istədiyimiz Juninyo hər oyunda olsun”.

Qurbanov zədəli olan futbolçularının durumundan da danışıb: “Marko Veşoviçdə daha ciddi görünür. Yassin Benziada gedişata baxacağıq. Həkimlər 10-12 gün deyiblər, amma hər bir halda, əzələ məsələsidir. Əzələ elədir ki, tələssən, problem yarana bilər. Ayın 26-da oyuna hazır olmaq ehtimalı var. Amma 100 faiz hazır olmasa, risk etməyəcəyik. Çünki böyük ehtimalla, milliyə dəvət edəcəklər”.

O, transfer çalışmalarından da söz açıb: “Vaxtımız var. Yüngül danışıqlara başlamışıq. Hər bir halda, hər şeyə mövsümün sonunda aydınlıq gələcək. Komandaya gətirmək istədiyimiz oyunçularla da danışıqlar var. Amma yekunlaşdırılan yoxdur”.

Kadi Borges, Mahir Emreli və Musa Qurbanlı ilə hələ heç bir danışıqları olmadığını söyləyən Qurban Qurbanov avrokuboklar uğrunda mübarizə aparan 4 komandanın hər birinin şansının eyni olduğunu qeyd edib: “Maraqlı sonluq olacaq. Hər birinə uğurlar arzulayıram”.