“Həmin mövzular qıcıq yaradır”

“Bu oyun klub olaraq bizim üçün vacib idi. Futbolçuların psixoloji gərginlikdən çıxması, birliyimiz üçün önəmli matç idi. Rəhbərliyə təşəkkür edirəm, komandanın arxasında oldular”.

Futbolxeber.az saytının məlumatına görə, bu sözləri “Turan Tovuz”un baş məşqçisi Ayxan Abbasov Azərbaycan Premyer Liqasının 34-cü turunda səfərdə “Araz-Naxçıvan”a 1:0 hesabı ilə qalib gəldikləri oyundan sonra deyib.

Mütəxəssis ikinci hissədə yaxşı hücumlar qurduqlarını bildirib: “Turnir cədvəli baxımından həm bizim üçün, həm də rəqib üçün rahat oyun idi. Görüşə nəzarət edirdik. Amma rəqibin təhlükəli əks-hücumları oldu. Birinci hissədə rəqibin cərimə meydançasında qərarlarımız düzgün olmadı. İkinci yarımda isə yaxşı hücumlarımız oldu. Yolumuza davam edəcəyik. İki oyunumuz qalıb. Daha sonra növbəti mövsümü fikirləşəcəyik”.

O, bəzi futbolçularının həvəssiz görünməsinə fikrinə belə münasibət bildirib: “Turnir cədvəlindəki durum təsir edir. Həvəssiz deməzdim, rahatlıq var idi. Oyunun içində çox yaxşı şeylər etdik. Bu, gələcəyimiz üçün vacib olacaq”.

A.Abbasov Kamal Bayramovun mətbuata verdiyi açıqlamalar barədə fikrini bölüşüb: “Kamal kapitan kimi danışmalı idi. Onun danışmağında heç bir qəbahət yoxdur. Amma özünə də demişəm ki, bəzi mövzulardan uzaq olmaq lazım idi. Həmin mövzular qıcıq yaradır. Köhnə illərin söhbətlərinə qayıtmaq bu gün bizim mövzumuz deyil. Premyer Liqada möhkəmlənmək, özümüzə uyğun oyun stili formalaşdırmağa çalışırıq. Bəzən alınır, bəzən alınmır. Alınmayanda basqılar olacaq. Kamalın bir az diqqətli danışmağı daha yaxşı olardı. Tövsiyələrimizi vermişik. Kamal özü də başa düşür”.