“AFFA rəhbərliyi Azərbaycanı UEFA-da yeni sima kimi təqdim edə bildi”

“Əziz Azərbaycan futbol ailəsini salamlayıram. İlk növbədə UEFA prezidenti Aleksandr Çeferinin salamlarını sizlərə çatdırıram”.

Futbolxeber.az saytının məlumatına görə, bu sözləri UEFA İcraiyyə Komitəsinin üzvü Sərvət Yardımçı AFFA-nın Hesabat-Seçki Konfransında çıxışı zamanı deyib.

O, geridə qalan 16 ilin Azərbaycan futbolu üçün enişli-yoxuşlu olduğunu bildirib: “UEFA adından Rövnəq Abdullayevə 16 il ərzində AFFA-ya rəhbərlik etdiyi üçün təşəkkür edirəm. Bu müddət ərzində enişli-yoxuşlu yollardan keçilib. Geridə qalan müddətdə AFFA rəhbərliyi Azərbaycanı UEFA-da yeni sima kimi təqdim edə bilmişdir. Bu töhfə üçün sizə təşəkkür edirəm. Gələcəkdə AFFA-ya dəstəyimizi davam etdirəcəyik. Yenə də qarşıdakı mərhələdə Azərbaycan futboluna strateji yönümlü investisiya yatırdacağıq”.

O, bugünkü Konfransda iştirak etməkdən məmnun olduğunu söyləyib: “Uzun illər ərzində birgə, müştərək fəaliyyət göstərdik. Bir millət, iki dövlət olaraq bura gəlməyi çox istədim. Mən sizin həmyerlinizəm. Rövnəq bəy sizə təşəkkür edirəm. Azərbaycan futboluna böyük fayda verdiniz. Rövşən bəy, sizə də indidən uğurlar arzu edirəm. Azərbaycna futbolunu daha da irəli aparacağınızdan şübhəm yoxdur”.

UEFA rəsmisi “Qarabağ”ın Avroliqadakı uğurlu çıxışından da söz açıb: “Onsuz da son illər Azərbaycanı futbolu inkişafdadır. “Qarabağ” Avropada böyük iş gördü. “Bayer”ə uduzsa da, inanılmaz çıxış etdi. Təcrübə qazandıqca bu uğurların ardı gələcək”.