Mübariz Orucov: “İlk hissədə meydanda bir komanda var idi”

“İlk olaraq 31 mart - Azərbaycanlıların Soyqırımı Günü ilə əlaqədar xalqımıza başsağlığı verirəm, Allah rəhmət eləsin. İnşallah Allah bizə bir daha elə acılı günlər göstərməsin. Matça gəldikdə ilk hissə tam bizim üstünlüyümüzlə keçdi. Meydanda bir komanda var idi. Epizodlarımız çox oldu. Onlardan istifadə etsəydik, hesab arasındakı fərq daha böyük olardı”

Futbolxeber.az saytının məlumatına görə, bu sözləri “Sumqayıt”ın məşqçisi Mübariz Orucov Azərbaycan Premyer Liqasının 28-ci turunda “Araz-Naxçıvan”a 1:0 hesabı ilə qalib gəldikləri oyundan sonra deyib.

O, ikinci hissədə futbolçularda yorğunluq olduğunu bildirib: “Qaçırılan epizodlara görə ikinci hissədə komandada bir qədər gərginlik yarandı. Futbolçularda yorğunluq hiss olunurdu. Oruc tutan futbolçularımız da çox idi. Matçın başlama saatı da oruc tutanlar üçün əlverişsiz idi. Demək olar ki, ancaq su içib, oyuna davam etdilər. Bütün bunlara görə ikinci hissədə keyfiyyət bir qədər aşağı düşdü. Ümumilikdə oyun demək olar ki, bizim üstünlüyümüzlə keçdi. Haqlı və vacib qələbə qazandıq. Çempionatın son mərhələsindəyik. Bütün oyunlar vacibdir. Hər matça qələbə üçün çıxacağıq”.

Mütəxəssis bildirib ki, futbolçuları əlavə təzyiqdən uzaq tutmağa çalışırlar: “Turnir cədvəlindəki vəziyyət futbolçularda təzyiq yarada bilər. Lakin çalışırıq ki, futbolçuları bu təzyiqdən uzaq tutaq. Mütləq avrokuboklarda oynamalıyıq deyə tələbimiz yoxdur”.

“Sumqayıt”ın məşqçisi komandasının lehinə təyin olunan penalti epizodunu belə şərh edib: “Epizodu izləməmişəm. Amma eşitdim ki, rəqib komanda qərardan narazıdır. Haqsızlığı nədə görürlər? Təmas varmı? Bəziləri deyir ki, epizod bitmişdi. Xeyr, top meydançadadırsa və cərimə də varsa, bu, penaltidir. Təmas varsa, penalti verilməlidir”.

M.Orucov hakimlərin idarəçiliyindən razı qalmadıqlarını vurğulayıb: “Rəqib də narazıdır, biz də narazıyıq. Səhvlər var idi. Deməzdim ki, biz razı qaldıq, yaxud rəqibə qarşı haqsızlıq oldu. Hakim bir neçə epizodda bizim lehimizə olan cərimələri əks tərəf verdi. Yəni bizim də narazı qaldığımız epizodlar vardı”.

M.Orucov indiki məqamda 3 xalın baxımlı oyundan daha önəmli olduğunu söyləyib: “Dərindən fikirləşəndə indi 3 xal daha vacibdir. Yaxşı oyunla qələbə qazananda isə daha gözəl olur. Lakin real yanaşsaq, indi yaxşı oyundansa, 3 xalı üstün tutarıq”.

Mütəxəssis yayda heyəti gücləndirəcəklərini bildirib: “Avrokuboklara vəsiqə qazansaq da, qazanmasaq da, komanda gücənməlidir. O yöndə işlər görüləcək. Qışda transfer etmək istərdik. Amma qışda yaxşı futbolçu tapmaq çətindir. Oyunçu olsun deyə kimisə götürmək istəmədik”.