Ayxan Abbasov: “Əsas odur ki, futbolçularım inamlıdırlar”

“Stresli oyun gözləyirdik. Elə də oldu. Qalib gələ bilsəydik bir, pillə irəli çıxa bilərdik. Məğlub olsaydıq da, rəqibin böyük üstünlüyü olacaqdı. Oyun baxımından futbolçularımdan razı qaldım. Sona qədər dinamikanı saxlaya bildik”.

Futbolxeber.az saytının məlumatına görə, bu sözləri "Turan Tovuz"un baş məşqçisi Ayxan Abbasov Azərbaycan Premyer Liqasının 28-ci turunda "Səbail"lə oyundan (1:1) sonra keçirilən mətbuat konfransında deyib.

O, gözləmədikləri halda müdafiədə səhv etdiklərini bildirib: "Rəqib də bundan istifadə etdi. Ondan sonra hücumlarda olduq. Qapıçı bir neçə epizodda yaxşı oynadı. Bəlkə də ən yaxşı qol imkanı yaratdığımız oyun oldu. İkinci qolu vurmaq üçün hücumlarımızın sonluğu çatmadı. Şansımız var. Bundan sonrakı oyunlar da çətin keçəcək. Davam etməliyik. Əsas odur ki, səfərdə oynamağımıza baxmayaraq futbolçularım inamlıdırlar, inamlı çıxış etdilər. Amma qalib gəlmək üçün yetərli olmadı. Demək ki, bir qədər də artırmalıyıq. Futbolçularıma da bildirdim ki, inşallah gələn oyunlarda bunun bəhrəsini görəcəyik”.