"Qarabağ" rəsmisi: "Onu almaq istəyən mütləq bizə müraciət etməlidir"

“Qarabağ”ın İdarə Heyətinin üzvü Asif Asgərov Rusiyanın "Rubin" və "Krasnodar" klublarının Leandro Andrade ilə maraqlanması ilə bağlı yayılan məlumatlara münasibət bildirib.

Futbolxeber.az saytının məlumatına görə, o, "Sport-Express"ə açıqlamasında kabo-verdeli yarımmüdafiəçi ilə bağlı kluba rəsmi təklif gəlmədiyini deyib:

"Heç kim bizə Leandro ilə bağlı müraciət etməyib. Başqa klubların bizim komandadan hansısa futbolçunu izləməsi normaldır. Amma Andradeni almaq istəsələr, mütləq bizə müraciət edilməlidir. Çünki onun “Qarabağ”la müqaviləsi var”.

Xatırladaq ki, Andradenin agenti Uqo Kadjuda Rusiya mediasına bildirib ki, "Rubin" və "Krasnodar" futbolçu ilə maraqlanır.

Andrade bu mövsüm "Qarabağ"da 33 oyun keçirib, 10 qol vurub və 9 məhsuldar ötürmə edib.