Mehdi Cənnətov: “Neftçi” flaqmandır və hamı onu məğlub etmək istəyir” (MÜSAHİBƏ)

“Sumqayıt”ın qapıçısı Mehdi Cənnətovun Futbolxeber.az saytına müsahibəsi

- 2024-cü ili necə qarşıladız?

- Ailəmin ətrafında oldum. Valideynlərimin yanına yollanmışdım. Vaxtımı onlarla birgə keçirdim. Amma istirahət üçün elə də çox vaxt olmadı.

- Yaşından asılı olmayaraq hər bir valideyn, xüsusən də analar övladlarının daha çox yemək yeməsini, hazırlanan hər bir təamdan dadmasını istəyirlər. Bu baxımdan geriyə artıq çəki ilə qayıtmamısız?

- Yox (gülür). Düzdür, çempionat vaxtı qidalanma zamanı bir çox şeylərdən imtina etməli olursan. Amma bayram günlərində çox yemişəm, yaxşı qidalanmışam. Şükürlər olsun ki, məndə heç vaxt artıq çəki problemi olmayıb. Bu səbəbdən də çəki baxımından vəziyyətim idealdır.

- Qış fasiləsinin az olması çıxışınıza mənfi təsir göstərməyəcək?

- Bəli, prinsipcə, istirahət üçün vaxtımız az oldu. Amma bu, bir tərəfdən yaxşıdır. Çünki dşünmürəm ki, kimsə formadan tam düşüb. Vaxt az olduğu üçün istirahətdən qayıdarkən 30-40 faiz minimum hazır olursan. Təlim-məşq toplanışında isə tam özümüzə gəlməliyik. Antalyada əlimizdən gələni etməliyik ki, heç olmasa 70-80 faiz hazır olaq. Qalan 20-30 faizi də çempionatın gedişində yığacağıq.

- Peşəkar kimi fikriniz maraqlıdır: fasilənin az olması futbolçuların xeyrinədir, yoxsa ziyanına?

- Yayda avrokuboklardan kənarda qaldığımız üçün təxminən 1 ay dincəldik. Bu müddət yaxşı istirahət etmək, eləcə də futbol üçün darıxmaq baxımından kifayətdir. Qışda isə cəmi bir neçə gün dincələ bildik. Məncə, belə olması daha yaxşıdır. Bütün Avropada bu praktikadan istifadə edilir.

- Bu gün (söhbət dünən olub-red.) artıq məşqlərə başladız və hazırlıq prosesində əvəzedici heyətdən də gənclər yer almışdı. Onların arasında ümidvericiləri var?

- Gəncləri hər zaman əsas komandaya cəlb etmək lazımdır ki, inkişaf etsinlər. Bu, Azərbaycan futbolu üçün vacib məqamdır. Onlar “Sumqayıt”ın gələcəyidirlər. Əsas məsələ Antalyadakı yüklənmələrdir. Gənclər buna dözməlidirlər. İnanıram ki, hər şey yaxşı olacaq.

- Mövsümün ilk yarısını “Sumqayıt”ın aktivinə yazmaq olar. Çempionatda dördüncü pillədəsiz, üçüncü yerdən 1, ikinci yerdən 2 xal geri qalırsız. Üstəlik, ölkə kubokunda da 1/4 finala yüksəlmisiz. Bundan sonrakı hədəf nədir?

- Sona qədər mübarizə aparacağıq. Çempionatda komandalar turnir cədvəlində bir-birinə çox yaxındılar. Bir oyun uduzsan, xeyli aşağı düşə bilərsən. Buna görə də plankanı qorumaq lazımdır. İlk üçlüyə düşməyimiz mümkündür. Bu “Sumqayıt”ın gücü daxilindədir. Kubokda da rəqiblər güclüdür. Sona kimi irəliləməyə qadirik. Təvazökarlıqdan uzaq olsa da, uda bilməyəcəyimiz rəqib yoxdur.

- Təqvimə əsasən, yanvarın sonu, fevralın ilk həftəsi ərzində “Neftçi” ilə ardıcıl 3 oyun keçirəcəksiz, ikisi kubokda, biri isə çempionatda. Darıxdırıcı olmayacaq?

- Düşünmürəm. Çünki “Neftçi” flaqmandır və hamı bu komandanı məğlub etmək istəyir. “Neftçi” ilə matçlara çox ciddi hazırlaşacağıq. Təbii ki, asan olmayacaq. Amma qalib gəlmək lazımdır və bunun üçün əlimizdən gələni etməliyik.

Fərəc ASLANOV