Vaxtında verilmiş qərar, düzgün seçim - QEYD

Hələ ilk dövrədən sonra Adrian Mutunun "Neftçi"də çox duruş gətirə bilməyəcəyi gözlənilən idi. Həmin vaxt da qeyd etmişdik ki, vəziyyətdən çıxış yolu rumın mütəxəssisin klubdan göndərilməsidir. Əks halda "ağ-qaralar" çempionluq bir yana, medalsız belə qala bilər. Məsələ təkcə nəticələrdə deyil. Əsas problem onda idi ki, "Neftçi" normal, az da olsa gələcəyə ümid verən futbol oynamırdı. "Komanda yeni yığılıb", "vaxt lazımdı" və s. Bütün bunlar bəhanədən başqa bir şey deyildi. Ortada "Araz-Naxçıvan" nümunəsi var. Azər Bağırov sübut etdi ki, normal hazırlıq keçmədən, birlikdə bir yoxlama oyunu keçirmədən belə yaxşı futbol sərgiləmək mümkündür...

Nəhayət gözlənilən - Mutunun göndərilməsi dünən baş tutdu. Bildiyimiz qədəri ilə bu gedişdə həlledici məqam "Qarabağ"la oyun (0:2) olub. Həmin matçdan sonra mətbuat konfransına daxil olarkən rumın mütəxəssisin üz ifadəsindən klub rəhbərliyi tərəfindən yaxşı danlandığı hiss olunurdu. “Neftçi” son illər “Qarabağ”a dəfələrlə, hətta böyük hesabla da uduzub. Lakin heç birində dekabrın 18-də olduğu kimi aciz görünməmişdi. Kənardan belə təəssürat yaranırdı ki, Mutu futbolçularına meydanın mərkəzini keçməyi qadağan etmişdi. Oyundan sonra sosial şəbəkələrdə “Bu cür aciz “Neftçi” görməmişəm” yazan fanatların sayı-hesabı yox idi.

Odur ki, qış fasiləsi ərəfəsində Adrian Mutunun göndərilməsi tam doğru qərardır. “Filan qədər pul getdi”, “N qədər kompensasiya alacaq” tipli fikirlər isə “Neftçi” kimi klubun adına, imicinə yaraşmır.

Mutunun gedişini rəsmən açıqlayan “Neftçi” az sonra yeni baş məşqçisini ictimaiyyətə təqdim etdi. Bu, Miodraq Bojoviçdir. Rusiya futbolunun azarkeşləri monteneqrolu mütəxəssisi yaxşı tanıyır. Lakin Bojoviç yeni işində bismillah etməmiş artıq “tez-tez klub dəyişir”, “heç bir uğuru yoxdur” tipli atmacalar başlayıb.

Əvvəla, Bojoviç son illər azərbaycanlı məşqçi və futbolçuların yaxın düşə bilmədiyi Rusiya futbolunda rekordçudur. O, klub və mövsüm sayına görə Rusiya futbolunda ən yaxşı nəticəyə malik əcnəbi mütəxəssisdir. Bojoviç 11 mövsüm ərzində Rusiyanın 7 klubunu çalışdırıb. “Neftçi”nin seçiminin uğursuz olduğunu iddia edənlər həqiqətənmi düşünürlər ki, Rusiya kimi ölkədə “bacarıqsız” məşqçiyə 11 il şans verərlər? Təbii ki, yox. Hər halda “Amkar, “Moskva”, “Dinamo” (Moskva), “Rostov”, “Lokomotiv” (Moskva), “Arsenal” (Tula), “Krılya Sovetov” Bojoviçin qara qaşına, qara gözünə, yaxud da hündür boyuna aşiq olmayıb.

O ki qaldı “uğuru yoxdur”a, vikipediyaya baxmaq bu qədərmi çətindir? Yoxsa həqiqətənmi “Rostov”la, “Zenit”, “Spartak”, ÇSKA yox a, məhz “Rostov”la Rusiya Kubokunu qazanmaq, “Amkar” kimi klubla finala kimi irəliləməyi uğur saymırsız?

Təbii ki, zaman özü seçimin nə qədər uğurlu olub-olmadığını göstərəcək. Bizim qələmə aldığımız sadəcə ehtimaldır və hesab edirik ki, “Neftçi” bu dəfə seçimində yanılmayacaq. Hər halda avropalı mütəxəssislərlə müqayisədə, keçmiş SSRİ-dən olan məşqçilərin ölkəmizdə uğurları heç də az olmayıb. İstər Qriqorçuk olsun, istər Sxadadze, istərsə də Demyanenko...

İbrahim CƏFƏROV