"Qol imkanlarından yararlana bilməməyimiz bizi narahat edir"

"Maraqlı oyun alındı. Üç xal hər iki komanda üçün vacibdir. Futbolçulara yeni ilə pozitiv başlamaq üçün bu oyunun vacibliyini çatdırdıq. Çətin olsa da, qalib gəldik. Yeni ildə bu qələbənin yaxşı təsir edəcəyini düşünürəm".

Futbolxeber.az saytının məlumatına görə, bu sözləri "Neftçi"nin köməkçi məşqçisi Sənan Qurbanov Azərbaycan Premyer Liqasının  18-ci turunda bu gün "Kəpəz"ə qalib gəldikləri oyundan (2:0) sonra mətbuat konfransında deyib.

O qeyd edib ki, yaxşı oyunçu olsa, qış fasiləsində heyətə cəlb ediləcək: "Komandada hər zaman futbolçulara ehtiyac var. Rəqabət olsa, yaxşıdır. Hücum xəttində dişsizlik var. Qol imkanlarından yararlana bilmirik. Bu, bizi də narahat edir. Qışda "Neftçi"yə layiq oyunçu tapmaq çətindir. Axtarışlar var. Yaxşı oyunçu olarsa, komandaya cəlb edə bilərik".

S.Qurbanov "Texniki zonada futbolçular bu gün daha çox kimə qulaq asdılar?" sualını belə cavablandırıb: "Adrian Mutunun öz korpusu var. Onlarla burada tanış olduq. Alin-Nikola Çita ayaq üstə idi və danışan o idi. Artıq onların uçuş vaxtlarına az qaldığına görə konfransa mən çıxdım. Amma oyundan əvvəl də futbolçularla danışan Çita idi".