Peter Kinqs: "Azərbaycan çıxış etdiyim ən sülhsevər ölkələrdən biridir"

I Liqada mübarizə aparan “Karvan”ın nigeriyalı yarımmüdafiəçisi Peter Kinqsin Futbolxeber.az saytına müsahibəsi

- 10 turdan sonra "Karvan"ın çıxışını necə dəyərləndirirsiz?

- Çempionata yaxşı başlamışıq. Bundan öncə keçirdiyimiz bütün matçlarda baxımlı oyun göstərmişik. Düşünürəm ki, bizim yaxşı oyun üslubumuz var.

- Komandada əsas hədəfiniz nədir?

- Həmişə komandama kömək etmək başlıca məqsədimdir. "Karvan"ın Premyer Liqaya yüksəlməsi üçün bacardığım hər şey edəcəm. Komanda buna layiqdir. Əlimə düşən imkanları maksimum dəyərləndirəcəm.

- 10 tura 5 qol vurmusunuz. Çempionatın sonunda bombardir olmağı hədəfləyirsiniz?

- Əlbəttə, qollar vurmağa davam edəcəm. Hər oyun fərqlənmək istəyirəm.

- “Karvan”dakı hazırkı şərait ürəyinizcədir?

- Komandanın mövcud vəziyyəti məni qane edir. "Karvan"ın təmsil etdiyi Yevlax şəhəri olduqca sakitdir. Əhalisi sülhsevərdir. Ümumilikdə isə mənə görə Azərbaycan çıxış etdiyim ən sülhsevər ölkələrdən biridir.

- Bəs I Liqanın səviyyəsi barədə nə deyə bilərsiz?

- Çempionatın keyfiyyəti yaxşıdır. Amma düzünü deyim ki, arzum daha yüksək səviyyədə çıxış etməkdir.

- "Karvan"ın cari mövsümdəki hədəfi nədir?

- Əsas məqsəd sözsüz ki, Premyer Liqaya vəsiqə qazanmaqdır. Digər tərəfdən kubok oyunları da var. İnanıram ki, Azərbaycan kubokunda da mümkün olduğu qədər irəli gedəcəyik.

- “Karvan” cari mövsüm Premyer Liqaya vəsiqə qazana bilməsə, növbəti mövsüm başqa bir Azərbaycan klubunda çıxış etmək istərdiniz?

- Növbəti mövsüm Azərbaycan Premyer Liqasında çıxış etmək istəyirəm. Təklif gələrsə, bu barədə düşünmək olar.

- Azərbaycan Premyer Liqasını izləyirsiz? Hansı komandanın oyununu xüsusi qeyd edə bilərsiniz?

- Əksər klublar əsas liqada baxımlı oyun nümayiş etdirir. Lakin onu deyə bilərəm ki, öz ölkəmdə çıxış edəndən bəri mən "Qarabağ" azarkeş olmuşam. Onların oyun üslubunu çox bəyənirəm.

- Komanda yoldaşlarınızla münasibətiniz necədir?

- Onlar mənə isti münasibət göstərir. Hər biri ilə əla münasibətim var. Bir-birimizə hörmətlə yanaşırıq.

- Fikrinizcə, Azərbaycan çempionatı digər liqalarda oynamaq və püxtələşmək üçün trampling ola bilər?

- Məncə, Azərbaycan Premyer Liqası heç də zəif deyil. Liqada kifayət qədər yaxşı, əzmkar klublar mübarizə aparır. Onların oyun üslubu göz oxşayır. Ona görə də hazırda başqa ölkə barədə düşünmürəm.

- Sonda yevlaxlı azarkeşlərə nə demək istərdiz?

- Azarkeşlərimiz möhtəşəmdir. Onların bizə olan dəstəyini, hər oyun çəkdikləri əziyyəti yüksək qiymətləndirirəm. Bütün azarkeşlərimizə minnətdaram. Onların dəstəyi altında oynamaq həm xoş, həm də qürurvericidir.

Azad NURİYEV