Bilel Auaşeriya: “Turnir cədvəli barədə düşünmürük”

“İlk qolu fərdi səhv əsasında buraxdıq. Bundan sonra komanda şəklində daha çox pressinq etdik. Oyundan qopmamaq üçün çalışdıq. Bununla belə, "Qarabağ"a qarşı oynamağın asan olmadığını hamı bilir”.

Futbolxeber.az saytına açıqlamasında bu sözləri “Qəbələ”nin yarımmüdafiəçisi Bilel Auaşeriya Azərbaycan Premyer Liqasının XV turunda “Qarabağ”a 0:3 hesabı ilə uduzduqları oyun barədə danışarkən deyib.

Fransalı futbolçu erkən qolun matçın taleyini həll etdiyini düşünmür: “Belə deməzdim. Rəqib hesabı açdıqdan sonra da matçı nəzarət altında saxlamağa çalışırdıq. Həlledici "Qarabağ"ın vurduğu ikinci qol oldu. Bundan sonra oyuna köklənmək olduqca çətin idi”.

B.Auaşeriya “Qəbələ”nin qeyri-stabil çıxış etməsi fikri ilə razılaşmayıb: “Düşünürəm ki, “Qarabağ”la oyunda da fərqlənmək üçün xeyli şanslarımız oldu. Hətta bəzi epizodlarda hesabı bərabərləşdirə bilərdik. Biz "Qarabağ"ın ikinci dəfə fərqlənməyinə imkan vermək istəmirdik. Bu səbəbdən daim rəqibə qarşı təzyiq göstərirdik. Yalnız bu yolla qələbə qazanmaq olar. Düzdür, cari mövsüm istədiyimiz nəticələri qazanmırıq. Lakin bu, qeyri-stabilliklə bağlı deyil”.

O, hazırda turnir cədvəli barədə düşünmədiklərini vurğulayıb: “Yalnız hər oyuna maksimum nəticə qazanmaq üçün çıxırıq. Bütün rəqiblərə qarşı var gücümüzlə hazırlaşırıq. İnanıram ki, tezliklə qələbələri sıralayacağıq”.  

Azad NURİYEV