Heydər Əliyevin xatirəsinə həsr olunmuş minifutbol turnirinin açılış mərasimi keçirilib

Noyabrın 25-də Gənclər və İdman Nazirliyi, AFFA və Azərbaycan Minifutbol Federasiyasının birgə təşkilatçılığı ilə Ulu öndər Heydər Əliyevin xatirəsinə həsr olunmuş dövlət qurumları arasında minifutbol turnirinin açılış mərasimi keçirilib.

Futbolxeber.az saytının Azərbaycan Minifutbol Federasiyasının feysbuk səhifəsinə istinadən verdiyi məlumata görə, tennis Akademiyasında keçirilən mərasim Ulu öndər Heydər Əliyev haqqında videoçarxın nümayiş edilməsi ilə başlanıb. Sonra Vətən müharibəsi şəhidlərinin əziz xatirəsi bir dəqiqəlik sükutla yad edilib.

Tədbirdə komandaların təqdimatından sonra Azərbaycan Minifutbol Federasiyasının vitse-prezidenti Taleh Nəsibov, AFFA-nın baş katibi Sərxan Hacıyev və gənclər və idman naziri Fərid Qayıbov çıxış edərək iştirakçılara uğurlar arzulayıblar. Mərasimin rəsmi hissəsi Dövlət Himnimizin səsləndirilməsi ilə başa çatıb.

Tədbirin bədii hissəsində gimnastlar nümunəvi çıxışları ilə azarkeşlərə öz ustalıqlarını nümayiş etdiriblər.

Açılış mərasimindən sonra ilk turun oyunu keçirilib. SOCAR (Dövlət Neft Şirkəti) ilə Dövlət Gömrük Komitəsi komandaları qarşılaşıblar. Oyun SOCAR-ın qələbəsi ilə başa çatıb - 4:1.