“Zirə”nin prezidenti: “Rəşad Sadıqovun millini çalışdırmaq üçün nüfuzu da var, hörməti də”

“Rəşad Sadıqov vətənini, dövlətini, bayrağını sevən adamdır. Bu, hər kəsə məlumdur”.

Futbolxeber.az saytına müsahibəsində bu sözləri “Zirə”nin prezidenti Taleh Nəsibov Rəşad Sadıqovun adının milli komandamızın baş məşqçisi vəzifəsinə namizəd kimi göstərilməsinə münasibət bildirərkən deyib.  

Klub rəhbəri qeyd edib ki, Rəşad Sadıqov Azərbaycan millisində uğurlu fəaliyyət göstərə bilər: “Rəşad Sadıqov Azərbayan futbolunun əfsanəsidir. Millini çalışdırmaq üçün onun nüfuzu da var, hörməti də. Məşqçilik bacarığı da ortadadır. “Zirə”nin bugünkü performansı göz önündədir. Millidən təklif olsa, Rəşad yığmada uğurlu nəticələr əldə edə bilər. Həm də unutmaq olmaz ki, Sadıqov uzun illər Azərbaycan millisinin kapitanı, lideri olub”.

“Bəs Sadıqovun gedişi “Zirə” üçün ciddi itki hesab olunmayacaq?” sualını T.Nəsibov belə cavablandırıb:  “Əlbəttə, bu, ciddi itki olacaq. Amma hadisələrin gedişatını zaman göstərəcək. Təklif olsa, biz bunun qarşısını ala bilmərik. Milli komandamız hamımız üçün vacibdir. Hər birimiz amillimizin daha uğurlu çıxış etməsini istəyirik. Məncə, Rəşad Sadıqov bu vəzifəsindən öhdəsindən uğurla gələ bilər. O, uduzmağı sevmir”.

Fərəc ASLANOV