Murad Musayev: “Azərbaycan millisi ilə bağlı təklif olarsa, müzakirə edə bilərik”

“Bu gün meydanda parlaq oyun var idi. Hər iki komanda hücum futbolu sərgilədi. "Qarabağ"a qarşı oynayırsansa, bu cür səhvlər etməməlisən, iki asan qol buraxmamalısan. Penaltini vura bilmədik. Oyundan sonra futbolçularım əlini sıxdım. Meydandakı mübarizələrinə görə onlara bir söz deyə bilmərəm. Əllərindən gələni etdilər. Yaxşı oyun oldu, amma nəticə bizim üçün pis oldu”.

Futbolxeber.az saytının məlumatına görə, bu sözləri "Sabah"ın baş məşqçisi Murad Musayev Azərbaycan Premyer Liqasının 14-cü turunun "Qarabağ"a 1:2 hesabı ilə uduzduqları oyundan sonra keçirilən mətbuat konfransında deyib.

"Penaltidən düzgün istifadə edə bilməməyimiz önəmli an idi. Əgər qol vursaydıq, fərqli olacaqdı. Çünki rəqib daha çox hücuma çıxacaqdı və arxada boşluqlar buraxacaqdı. Biz də ondan yaxşı istifadə edə bilərdik. Deyə bilmərəm ki, qırılma anı o idi. Amma oyunun ən önəmli anlarından biri oldu", - deyə o bildirib.

Rusiyalı mütəxəssis Elvin Camalovu oynatmamasının səbəbini belə izah edib: "Aleksey İsayev və Kristian Da Silva Elvindən daha yaxşı formadadırlar. Elvin demək olar ki, millidə oynamadı. Kristian iki həftədir ki, çox yaxşı formadadır. "Turan Tovuz"a qarşı da səfərdə çox yaxşı oyun keçirmişdi. Ona görə də, onların hər ikisinə bu gün fürsət verdik ki, oynasınlar”.

Musayev qapıçı məsələsinə də toxunub: “Nicat Mehbalıyevin də oyunu barəsində heç bir iradım yoxdur. O, çox yaxşı çıxış edir. Demək olar ki, komandanı önəmli matçlarda xilas edir. Davit Volkovu isə səhhəti ilə bağlı problemi var idi deyə əvəzlədik".

M.Musayev özünü Azərbaycan millisinin baş məşqçisi vəzifəsində görüb-görmədiyi ilə bağlı sualı belə cavablandırıb: "Sabah"ın baş məşqçisi olmasaydım, Azərbaycan millisində işləmək mənim üçün böyük şərəf olardı. Ancaq indi mən "Sabah"ın baş məşqçisiyəm və bütün fikrim də bu klubla bağlıdır. Azərbaycanda çox yaxşı futbolçular var və milli çox yaxşı futbol sərgiləyə bilirlər. Onlara da gələcəkdə uğurlar arzulayıram".

O, "Zenit"in baş məşqçisi Sergey Semak "Sabah"ın uğursuz çıxışı haqda danışarkən, "Murad Musayevin performansına mövsümün sonunda baxarsız" deyib. Sizcə, o, nəyi demək istəyirdi" sualına bu cür cavab verib: "Onun özündən soruşun. Bəli, biz bir-birimizi yaxşı tanıyırıq. Mən orada təcrübədə olmuşam. Əfsuslar olsun ki, "Neftçi" - "Zenit" oyunu günü mən Rusiyaya uçmalı idim. Fikrimcə, o, bunu turnir cədvəlində daha yaxşı yerdə olacağımızla bağlı demək istəyirmiş”.

M.Musayev həm "Sabah"da, həm də Azərbaycan millisi çalışdıra bilmək ehtimalı ilə bağlı deyib: "Təklif olarsa, müzakirə edə bilərik. Amma indi ortada heç nə yoxdur, heç danışıq da olmayıb. Bütün düşüncələrim "Sabah"la bağlıdır".