“Olimpiakos”u mübarizədən kənarlaşdırmaq üçün əlimizdən gələni edəcəyik”

“Olimpiakos”la matça qədər hələ ölkə çempionatında oyunumuz var. Demək olar ki, 8 günə 3 görüşə çıxırıq. Burada əsas məqam futbolçuların bərpasıdır. Çalışırıq balanslı şəkildə hamıya şans verək ki, “Olimpiakos”la oyunda yorğunluq olmasın”.

Futbolxeber.az saytına müsahibəsində bu sözləri UEFA Gənclər Liqasının ikinci mərhələsində “Olimpiakos”la qarşılaşacaq “Qəbələ”nin 19 yaşadək futbolçulardan ibarət komandasının baş məşqçisi Famil Xəlilov deyib.

İlk mərhələdə Şimali Makedoniyanın “Puşkaş Akademiyası”nı mübarizədən kənarlaşdıran “qırmızı-qaralar”ın baş məşqçisi qeyd edib ki, Yunanıstan təmsilçisi ilə matçda da uğur qazanmaq arzusundadırlar: “Təbii ki, ikinci mərhələni də keçmək istəyirik. “Olimpiakos” hər nə qədər güclü olsa da, onları mübarizədən kənarlaşdırmaq üçün əlimizdən gələni edəcəyik”.

F.Xəlilov Yunanıstan təmsilçisinin üstün cəhətlərindən də söz açıb: “Olimpiakos” digər rəqiblə müqayisədə daha güclüdür. Komanda şəklində həm hücum edir, həm də yaxşı müdafiə oluna bilirlər. Heyətdə kifayət qədər təhlükəli futbolçular var”.

Mütəxəssis ilk matçı evdə keçirmələrini üstünlük hesab etmir: “Deməzdim ki, ilk matçı evdə keçirməyimiz bizim üçün üstünlükdür. Sadəcə düzgün şəkildə oynamalıyıq. Hansı komanda daha az səhv etsə, o da növbəti mərhələyə yüksələn tərəf olacaq”.

Xatırladaq ki, “Olimpiakos”a qarşı noyabrın 8-də baş tutacaq ilk matç Qəbələ şəhər stadionunda təşkil olunacaq. Görüş saat 16:00-da başlayacaq. Cavab oyunu noyabrın 29-da Pireydə keçiriləcək. Matç “Olimpiakos” Məşq Mərkəzində baş tutacaq. Yunanıstandakı qarşılaşmanın start fiti Bakı vaxtı ilə saat 19:00-da veriləcək.

Azad NURİYEV