Azər Bağırovdan qələbə şərhi: “Qolları vaxtında vura bildik”

“Uşaqlardan hər zaman səbrli olmağı tələb edirəm. Müdafiədən hücuma keçməyimiz uğurlu alınır. Bu gün də belə oldu. Çox vacib qələbə qazandıq. Amma “Qarabağ”dan öyrəniləsi çox şey var”

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Azər Bağırov Azərbaycan Premyer Liqasının XI turunda “Qarabağ”ı 2:1 hesabı ilə məğlub etdikləri oyundan sonra deyib.

CBC Sport-a açıqlamasında o, qələbəyə baxmayaraq, üstünlüyün rəqibin tərəfində olduğunu bildirib: “Deməzdim ki, böyük üstünlüyümüz oldu. Sadəcə qolları vaxtında vura bildik. Rəqibin bir anlıq boşalmasından istifadə edib, əvvəlcə penalti qazandıq, daha sonra isə əks-hücumda “Qarabağ”ı yaxaladıq. Bu gün “Qarabağ”dan üstün idi. Şükürlər olsun ki, 3 xalı qazanan biz olduq. Düşünürəm ki, “Qarabağ”ın həftə arası Avroliqa matçınnı olması bu gün bizim xeyrimizə işlədi”.

A.Bağırov qeyd edib ki, bundan sonra komandası qarşıdakı oyunlara daha çox köklənməlidir: “Bu qələbə sayəsində üçüncü pilləyə yüksəlsək də, hələ heç nə bitməyib. Bundan sonra təzyiqlər daha çox olacaq. Qarşıdakı oyunlara daha artıq köklənmək lazımdır ki, bütün bunların öhdəsindən gələk. Turlar keçdikcə rəqiblər “Araz-Naxçıvan”a daha ciddi yanaşırlar”.