Elşad Quliyev: “Favorit olaraq ilk 5-likdə göstərilirik”

“Komandada ümumi vəziyyət, ab-hava çox yaxşıdır. İlk dəfə dünya çempionatına gedirik. İnanıram ki, vətənə gülə-gülə qayıdacağıq”.

Futbolxeber.az saytının məlumatına görə, bu sözləri minifutbol üzrə milli komandamızın baş məşqçisi Elşad Quliyev deyib.

Dünya çempionatında iştirak etmək üçün Birləşmiş Ərəb Əmirliklərinə yollanan yığmamızın çalışdırıcısı hava limanında jurnalistlərin suallarını cavablandırıb.

Mütəxəssis qrup mərhələsindəki rəqibləri araşdırdıqlarını bildirib: “Rəqiblər haqda tam olmasa da, 50 faiz məlumatımız var. Daha güclü qrupa düşə bilərdik. Lakin reyqintə görə münasib rəqiblərlə üz-üzə gələcəyik. İlk oyundan çox şey asılıdır”.

E.Quliyev mundialdakı hədəflərindən də söz açıb: “Minimum hədəf qrupdan çıxmaqdır. İnanıram ki, daha da irəli gedə bilərik”.

O, artıq rəqiblərin Azərbaycan millisinə daha ciddi yanaşdıqlarını vurğulayıb: “Favorit olaraq ilk 5-likdə göstərilirik. Buna görə də rəqiblər bizə qarşı daha ciddi yanaşırlar. Bu da işimizi çətinləşdirir. Artıq əksər matçlarda 1 nömrə kimi oynamalıyıq. Qarşılaşmalarda diktə edən tərəf biz olacağıq. Rəqiblər müdafiədə sıx oynayırlar ki, az qol buraxsınlar. Bütün bunlar bizi qorxutmur. Məşqlərdə müxtəlif taktiki gedişlər üzərində işləmişik”.

Yığmamızın baş məşqçisi komandanın aparıcı üzvü Bəxtiyar Soltanovun dünya çempionatı üçün heyətdə yer almamasına belə aydınlıq gətirib: “Bəxtiyarın səhhətində problemlər var idi. Ona görə heyətdən kənarda qaldı. Amma o, komandamızın daimi üzvüdür və gələcəkdə yenə də yığmanın düşərgəsində olacaq”.

İbrahim CƏFƏROV