Şahin Diniyev: “Azərbaycan çempionatları tarixinin ən maraqlı mövsümü keçir”

“Bəlkə də Azərbaycan çempionatları tarixinin ən maraqlı mövsümü keçir”.

Futbolxeber.az saytının məlumatına görə, bunu “Report”a açıqlamasında “Səbail”in baş məşqçisi Şahin Diniyev Azərbaycan Premyer Liqasında 2023/2024 mövsümünün geridə qalan 7 turunu dəyərləndirərkən deyib.

57 yaşlı mütəxəssis gərgin oyunlar keçdiyini söyləyib: “Hər kəs razılaşar ki, çox maraqlı çempionat keçir. Komandalar arasında səviyyə baxımından böyük fərq yoxdur. Təxminən bir-birilərinə yaxındırlar. İstənilən matçla bağlı öncədən proqnoz vermək çətindir. Çox yaxşı tendensiya yaranıb ki, artıq autsayder-lider anlayışı yoxdur. Hər bir komanda istənilən rəqibdən xal almaq iqtidarındadır. Sıradan matç yoxdur, hər oyun finala bərabərdir. Əvvəllər də gərgin alınan mövsümlər olub. Sadəcə, həmin vaxtlar lider və autsayderlər qrupu olub. Bu mövsüm belə qruplar yoxdur. Həm məşqçilər, həm futbolçular, həm də azarkeşlər üçün maraqlı mövsüm keçir”.

“Səbail” 13 xalla turnir cədvəlinin ikinci pilləsində qərarlaşmasına baxmayaraq, Ş.Diniyev hələ də istədikləri formada olmadıqlarını etiraf edib: “Səbail” öz yolu ilə davam edir. İstər uğuru, istərsə də uğursuzluğu eyni formada qəbul edirik. Yenidən qurulan heyətimiz var, 80-90 faiz dəyişiklik olub. Buna görə də potensialı açmaq üçün zamana ehtiyacımız var. Keçirilən hər oyun futbolçularda özünəinamı artırır”.

O, Premyer Liqanın VIII turunda “Sabah”la keçiriləcək ev matçına da toxunub. Diniyev rəqibin yüksək səviyyəli futbolçulara malik olduğunu vurğulayıb: “Bacarıqlı baş məşqçiləri var, işini bilən kollektivdir. Bəzi oyunlarda bəxtsizlik, fərdi səhvlər ucbatından xallar itiriblər. Ancaq “Sabah”ın gücü hamıya bəllidir. Bizi çətin görüş gözləyir. Digər matçlar kimi, bu da bizim üçün finala bərabər olacaq. Artıq nə bizə, nə də onlara asan rəqib var”.

Qeyd edək ki, sentyabrın 30-da “ASCO Arena”da keçiriləcək “Səbail” - “Sabah” görüşü saat 18:00-da başlayacaq.