Fərrux Mahmudov: “Sentyabrın 7-dən sonra daha güclü “Neftçi” görəcəyik” (MÜSAHİBƏ)

“Neftçi”nin prezidenti Fərrux Mahmudovun Futbolxeber.az saytına müsahibəsi.

- Azərbaycan Premyer Liqasının son turunda “Neftçi” səfərdə “Sabah”la bərabərə qaldı (1:1). Həmin görüşdə komandanın çıxışından razı qaldınız?

- “Sabah”la oyunun nəticəsi məni razı salmadı. Çünki səfərə qələbə üçün yollanmışdıq. Təəssüf ki, yekunda 1:1 hesabı qeydə alındı. Gərgin oyun alındı, xeyli vərəqə göstərildi.

- Vərəqədən söz düşmüşkən, matçın ikinci hissəsində baş hakim Əliyar Ağayev “Sabah”ın müdafiəçisi Amin Seydiyevə qırmızı əvəzinə, sarı vərəqə göstərdi. Qarşılaşmadan sonra mütəxəssislər, ekspertlər, bir sözlə, hər kəs referinin səhvə yol verdiyini dedi. Qəribədir ki, “Neftçi” bu epizodla bağlı hər hansı bir etiraz bildirmədi...

- Hardan bilirsiz ki, etiraz etməmişik?

- Hər halda belə bir açıqlama gözümüzə dəyməyib.

- Xeyr, etiraz etmişik. Qarşılaşmadan sonra Peşəkar Futbol Liqasının prezidenti Elxan Səmədova zəng vurduq. Hakimliklə bağlı söhbətimiz oldu. Elxan müəllim cavabında bildirdi ki, bütün epizodlar baxılacaq və bizə geridönüş edəcəklər.

- “Neftçi” artıq cari mövsüm avrokuboklardakı çıxışını başa vurdu. “Beşiktaş”la səfər matçını necə dəyərləndirərdiz?

- Təbii ki, hər iki oyun bizim üçün çox çətin keçdi. Ümumiyyətlə, “Beşiktaş” kimi klubu Konfrans Liqasında görmək qəribədi. Dünya səviyyəli klubdu. Onlarla oynamaq futbolçularımız üçün bir təcrübə oldu. Mutu cavanlara da şans verdi. Bu, bizim üçün pozitiv məqam idi. Cavab görüşündə fasiləyə 1:0 hesabı ilə üstün yollandıq. Hətta ikinci qolu da vura bilərdik. Matias yaxaladığını şansı dəyərləndirsəydi, bəlkə də hər şey fərqli olardı.

- Transfer çalışmaları davam edir, yoxsa “Neftçi” hazırkı heyətlə yoluna davam edəcək?

- Hazırda iki transfer üzərində çalışırıq. Biri sağ vingerdi, digəri isə mərkəzi hücumçusu. Keçidlərdən biri artıq yekunlaşmaq üzrədi. Ümid edirəm ki, qarşıdakı günlərdə bu transferi ictimaiyyətə açıqlayacağıq.

- Geridə qalan müddətdə yeni transferlərin çıxışından nə dərəcədə razısız? Azarkeşlər xüsusən Ervin Koffindən narazılıq edirlər...

- Biz yeni tranferlərin hamısına inanırıq, sona kimi də inanacağıq. Hələ tezdi, 1-2 oyuna görə fikir bildirmək düzgün olmaz. Koffi gələn kimi zədələndi. Azarkeşlər də inanmalıdılar. Nəzərə alaq ki, uyğunlaşmaq üçün bir qədər vaxt lazımdı. Qarşıda komandanın toplanışı olacaq. Toplanışdan sonra daha güclü “Neftçi” görəcəyik.

- Hazırlıq prosesi ölkə xaricində olacaq?

- Bəli, böyük ehtimalla Türkiyədə olacaq. 1-7 sentyabr tarixlərində.

- Bir müddət əvvəl Rusiya mətbuatı sentyabrda “Neftçi”nin yenidən “Zenit”lə qarşılaşacağını yazırdı. Belə çıxır ki, həmin görüş baş tutmayacaq?

- “Bu gün “Zenit”dən mənə zəng gəldi. Onlar yenidən bizimlə qarşılaşmaq istəyirlər. Lakin “Zenit” bu dəfə görüşün Bakıda keçirilməsini istəyir, özü də noyabr ayında. Bu barədə baş məşqçimizlə söhbətimiz olacaq. Yekun qərar Mutudan asılıdı. Əgər hər hansı bir başqa plan olmasa, noyabrda bu qarşılaşma baş tuta bilər”.

- Sabir Buqrinin “Neftçi”yə qayıdacağı barədə yayılan xəbərlər nə dərəcədə doğrudu?

- Bu barədə mən də fan-səhifədən oxudum. Açığı, azarkeş səhifələrində hərdən maraqlı xəbərlər olur, bilmirəm onları hardan əldə edirlər (gülür). Bəlkə də Buqrin qayıtmaq istəyir, bu barədə azarkeşlərə nəsə deyib. Lakin rəsmi olaraq bu, şayiədi.

Fərəc ASLANOV