Tahir Gözəl: “Rakuv”un futbolçuları 15-20 dəqiqəni yerdə keçirdilər”

“Çox məyusuq. “Qarabağ” 90 dəqiqə yaxşı oynadı. Qol vurmaq üçün fürsətlərimiz də var idi. Təəssüf ki, onlardan istifadə edə bilmədik. Bu, futboldu və bəzən istədiyin meydanda alınmır”.

Futbolxeber.az saytına açıqlamasında bunu “Qarabağ”ın prezidenti Tahir Gözəl UEFA Çempionlar Liqasının ikinci təsnifat mərhələsi çərçivəsində “Rakuv”a qarşı keçirilən cavab oyunundan (1:1) sonra deyib.

İlk görüşdə səfərdə 2:3 hesabı ilə uduzan “Qarabağ” Çempionlar Liqasında mübarizəni dayandırıb. Klub rəhbəri bundan sonra Avropa Liqasında uğurlu çıxış edəcəklərinəa inanır: “Matç bitən kimi paltardəyişmə otağına yollandım və futbolçuları təsəlli etdim. Bildirdim ki, bu iş hələ bitməyib. İnanıram ki, Avropa Liqasında daha yaxşı çıxış edəcəyik”.

T.Gözəl rəqibin ikinci hissədə xeyli vaxt uzatdığını, lakin bunu normal qarşıladıqlarını qeyd edib: “Topa nəzarət bizdə idi. Oyunda diktə edən tərəf “Qarabağ” idi. Rəqib isə daha çox vaxt aparmağa çalışırdı. 15-20 dəqiqəni elə yerdə keçirdilər. Lakin rəqibi qınamırıq. Onlar da mərhələ adlamaq istəyirdilər. Bu da futbolun bir parçasıdı”.

Klub rəhbəri yeni transferlərin olub-olmayacağı barədə sualı belə cavablandırıb: “Transfer məsələsində Qurban Qurbanovun qarşısında heç bir əngəl yoxdu. Nə vaxt istəsə, klub ona dəstək verməyə hazırdı”.

Sonda “Qarabağ”ın bu həftə start götürəcək Azərbaycan Premyer Liqasının yeni mövsümü barədə danışıb: “Hər zamanki kimi, bu mövsüm də “Qarabağ”dan çempionluq gözləyirəm. Bəli, rəqiblər güclənib. Bizi çox maraqlı bir mövsüm gözləyir. Məncə, bu cür rəqabət gələn mövsüm avrokuboklarda çıxış edəcək bütün klublarımıza müsbət təsir göstərəcək”.

Fərəc ASLANOV