Rəşad Sadıqov: “Tək biz deyil, digər komandalar da transferlərdə problem yaşayır”

“Artıq 20 gündür ki, məşqlərə başlamışıq. Hazırlıq prosesi çərçivəsində ilk oyunumuz idi. Sevindirici haldır ki, yoldaşlıq oyunu olmasına baxmayaraq, futbolçular matça çox ciddi yanaşdılar”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov “Kəpəz”i 2:1 hesabı ilə məğlub etdikləri yoxlama görüşü barədə danışarkən deyib.

O, komandasının çıxışından razılığını ifadə edib: “Söhbət nəticədən getmir. Əsas olan komandanın göstərdiyi futbol və meydandakı nizam-intizamdır. Futbolçuların məsuliyyətli olması bizi sevindirir. Ümumən komandamın çıxışından razı qaldım”.

Sadıqov yeni transferlərlə bağlı axtarışlarının davam etdiyini bildirib: “Hər mövsüm öncəsi komandada dəyişiklik olur, kimlərsə gedir, onların əvəzinə başqaları gəlir. Bəzən aparıcı futbolçuları komandada saxlamaq mümkün olmur. Yaxud lazımi transferləri reallaşdıra bilmirsən, seleksiya uğursuz olur. Bir çox səbəblər var. Bir neçə mövqeyə transferlər etmək istəyirik. Axtarışlarımız davam edir”.

“Zirə”nin çalışdırıcısı gücləndirmək istədiyi mövqeləri də açıqlayıb: “Mərkəz yarımmüdafiəçisi, stoper transfer etmək istəyirik. Hazırda cəmi 2 stoperimiz var. Ona görə də bu mövqeyə mütləq futbolçu alınmalıdı. Eləcə də legioner qapıçı götürməyi və hücumameyilli bir futbolçu transferini planlaşdırırıq. Ən azı daha 3-4 transferə ehtiyac var. Lakin nə dərəcədə alınıb-alınmayacağını zaman göstərəcək”.

R.Sadıqov “Kəpəz”lə oyunun ikinci hissəsində şans verdiyi əvəzedici heyətin futbolçularının Türkiyəyə təlim-məşq toplanınışına yollanmaq ehtimalına da toxunub: “O futbolçuların çoxu bizimlə birgə həftəiçi məşqlərdə iştirak edirlər. Keçənildən bəzi futboçuları əsas komandanın məşqlərinə cəlb edirik. Onları diqqətdə saxlayırıq. 1-2 nəfərin Türkiyəyə getməsi mümkündü. Mövqelərə baxacağıq. Zədəli futbolçularımız var. Hazırda komandada 3-4 nəfər zədədən əziyyət çəkir. Elə etməliyik ki, toplanış zamanı ən azı hər mövqedə 2 sağlam futbolçumuz olsun”.

O, yeni transferlərin yubanmasına görə təəssüfləndiyini gizlətməyib: “Tək biz deyil, digər komandalar da transfer baxımından problem yaşayır. Hər məşqçi istəyir ki, toplanışın ilk günündən yeni transferlər sərəncamında olsun. Təəssüf ki, hələ ki alınmır”.

Mütəxəssis qeyd edib ki, Türkiyədə qarşılaşacaqları rəqiblərdən ikisinin adı artıq məlumdu: “Danışıqlar gedir, hələ tam siyahı tam bəlli deyil. Daha doğrusu, ikisi bilinir - “Karagümrük” və “Qaziantep”. Çalışırıq ki, həm bizim, həm də rəqiblərin planına uyğun olsun oyun. Oyunun tarixini əvvəldən proqramlaşdırmaq bir qədər çətindi. Ümid edirəm ki, gələcəkdə biz də o səviyyəyə çataq ki, əksər klublar bizimlə qarşılaşmaq istəsin. Lakin reallıq budur ki, indiki məqamda bizim kimi komandalar 1-2 ay əvvəldən rəqiblə razılığa gəlməyə çətinlik çəkir”.

ibrahim CƏFƏROV